डिचोली: नोकरीचे आमिष दाखवून अनेकांना कोटींचा चुना लावलेली प्रिया नाईक ही संशयित अजून फरारी असून, ती महाराष्ट्रात पळून गेल्याचा संशय आहे. पोलिसही तिच्या मागावर असल्याची माहिती मिळाली आहे.

संशयित प्रिया नाईक हिच्या विरोधात पोलिसांनी ‘भादंसं’च्या ४२० कलमाखाली गुन्हा नोंद केला आहे. दरम्यान, या प्रकरणामागील मास्टरमाईंड पोलिस कॉन्स्टेबल रोहन वेंझी याला सेवेतून निलंबित केल्याची माहिती मिळाली आहे. पोलिस चौकशी दरम्यान पोलिस कॉन्स्टेबल वेंझी याने संशयित महिलेला मदत केल्याचे आढळून आले असून, संशयित महिलेने वेंझी याच्या खात्यात रक्कम जमा केल्याचे उघड झाले आहे.

प्रिया नाईक या संशयित महिलेने केवळ नोकरीचेच आमिष दाखवून नव्हे, तर कधी मुलीवर तर कधी स्वतःच्या आईवर शस्त्रक्रिया करण्याचे कारण सांगून पैसे उकळल्याचे समजते. संशयित महिलेची मुलगी तालुक्यातील एका खासगी शाळेत शिकत होती. त्या शाळेतून मुलीचे नाव काढताना तिने आपण मुलीसह आपल्या गावी कोल्हापूर येथे जात असल्याचे कारण दिल्याचे समजते. महिलांसह अनेकांना गंडा घातलेली संशयित ठक महिला अजून पोलिसांना सापडत नसल्याने तिच्या आमिषाला बळी पडलेल्यांची चिंता वाढली आहे.