Bicholim News :

डिचोली, पोषक हवामानामुळे यंदा ''अबोली'' फुलांना समाधानकारक बहर आला असून, यंदा शिमगोत्सवात अबोली स्वस्त होणार असल्याचे संकेत मिळत आहेत.

''अबोली'' ही एक झुडूपवर्गीय वनस्पती. सुवासिक नसली, तरी नाजूक आणि आकर्षक रंगामुळे अबोलीची फुले सुंदर दिसतात. कोणत्याही फुलांच्या पंक्तीत हे फूल उठून दिसते. त्यामुळे या फुलांना मागणी असते.

असंतुलित हवामानामुळे गेल्यावर्षी स्थानिक ''अबोली'' फुलांच्या बहरावर मोठा परिणाम झाला होता. त्यामुळे गेल्यावर्षी मागणीच्यावेळी ऐन शिमगोत्सवात बाजारात ''अबोली''च्या फुलांचा तुटवडा निर्माण झाला होता. यंदा मात्र उष्ण हवामानामुळे सर्वत्र अबोली फुलांनी बहरल्या आहेत.

डिचोलीच्या बाजारात अबोलीची फुले दिसून येत आहेत. अबोलीच्या वेण्या आणि वेळेसर बाजारात उपलब्ध होत असून, गेल्यावर्षीच्या तुलनेत त्यांचे दरही परवडण्यासारखे आहेत. पुढील आडवड्यापासून फुलांची आवक वाढण्याची शक्यता आहे.

यंदा ‘अबोली’ला अच्छे दिन

पावसाळा संपल्यानंतर साधारण फेब्रुवारी-मार्च महिन्या दरम्यान ''अबोली''ची फुलांचा बहर असतो. शिमगोत्सवात साजरी होणारी घोडेमोडणी आणि कळसोत्सवात ''अबोलीं''च्या फुलांना प्रचंड मागणी असते. असंतुलीत हवामान आणि अधूनमधून पडलेल्या पावसामुळे गेल्यावर्षी ''अबोलीं''च्या फुलांवर मोठा परिणाम झाला होता.

गेल्यावर्षी बाजारात अबोलीच्या फुलांचा तुटवडा होता आणि भावही वाढला होता. त्यामुळे कर्नाटकातून येणाऱ्या फुलांना ‘अच्छे दिन’आले होते. यंदा मात्र बाजारात स्थानिक अबोलीच्या फुलांना तुटवडा जाणवणार नाही. तसे संकेतही फूल विक्रेत्यांकडून मिळाले आहेत.

‘अबोलीं''च्या स्थानिक फुलांना मागणी असल्याने आधीच ही फुले महाग असतात. त्यातच तुटवड्यामुळे गेल्यावर्षी या फुलांचा भाव वाढला होता. गेल्यावर्षी अबोलीच्या फुलांच्या बहरावर ५० टक्क्यांहून अधिक घट झाली होती.

गेल्यावर्षी शिमगोत्सव काळात ३५० रुपये प्रती गजरा (झेला), तर ८० ते १०० रुपये वेणी (फाती) असे अबोलीचे दर होते. अबोलीच्या फुलांना समाधानकारक बहर आल्याने फुलांचे दर नियंत्रणात राहणार.

सीमा नाईक, फूलविक्रेती.