डिचोली: रविवारपासून सक्रिय झालेल्या पावसाने डिचोलीत सर्वत्र झोडपून काढले. पावसाच्या तडाख्यात एका सरकारी कार्यालय इमारतीसह दोन ठिकाणी झाडे कोसळण्याच्या घटना घडल्या. मात्र, आर्थिक नुकसानी वगळता अन्य कोणताही अनर्थ घडला नाही.

अग्निशमन दलाकडून मिळालेल्या माहितीनुसार आज सकाळी मुळगाव येथील डब्ल्यूआरडीच्या इमारतीवर झाड कोसळून छप्पराची मोडतोड झाली. लिडींग फायर फायटर व्ही. एम. गाड यांच्या नेतृत्वाखालील दलाच्या जवानांनी घटनास्थळी धाव घेवून मदतकार्य केले. दुसऱ्या एका घटनेत सायंकाळी सुर्ल येथील पंचायतीजवळील शेडवर फणसाचे झाड कोसळले.

सोमवारी सकाळी आणि दुपारी दमदार पाऊस बरसल्यानंतर सायंकाळी पावसाचा जोर वाढला. रात्री उशिरापर्यंत पर्जन्यवृष्टी सुरू होती. आजच्या पावसामुळे जनजीवन पूर्णपणे विस्कळीत झाले. बहुतेक ठिकाणी रस्ते तसेच सखल भागात जलमय स्थिती निर्माण झाली होती.

नद्यांचे पाणीही वाढले होते. पावसामुळे वाहतुकीवरही परिणाम झाला. दरम्यान, दिवसभर पडलेल्या जोरदार पावसामुळे बळीराजा सुखावला असून त्याच्या चेहऱ्यावर हास्य फुलले आहे. आता शेतीची प्रलंबित कामे करण्यास मिळणार अशी शेतकऱ्यांना आशा वाटू लागली आहे.