Fire Incident In Bicholim

डिचोली: नववर्षाच्या पूर्वसंध्येला डिचोलीत माळरानाला आग लागण्याची घटना घडली. या घटनेत माळरान पूर्णपणे जळून खाक झाले. आग वेळीच नियंत्रणात आल्याने अनर्थ टळला. या घटनेत मोठीसी आपत्ती ओढवली नसली, तरी माळरानात चरायला गेलेल्या बकऱ्या सुरक्षित बचावल्या.

वाठादेव येथील झांट्ये महाविद्यालया समोरील मुख्य रस्त्याला लागून असलेल्या माळरानाला आग लागण्याची घटना घडली. झांट्ये बंधूची ही मालमत्ता असल्याचे समजते. या घटनेची माहिती मिळताच डिचोली अग्निशमन दलाचे लिडींग फायर फायटर साईनाथ केसरकर यांच्या नेतृत्वाखाली दलाच्या जवानांनी घटनास्थळी धाव घेतली.

दलाचे चालक गीतेश नाईक यांच्यासह संजय उसपकर, रुपेश पळ आदी जवानांनी मदतकार्य करुन आग नियंत्रणात आणली. आग लागली, त्यावेळी वीसच्या आसपास बकऱ्या माळरानात चरत होत्या. मात्र या बकऱ्यांनी वेळीच माळरानातून सुरक्षितस्थळी धाव घेतल्याने त्या बचावल्या. असे बकऱ्यांचे पालन करणाऱ्या युवकाकडून सांगण्यात आले.