Bicholim : कुडणे येथील श्री देवी महालक्ष्मी कुडणेश्वर देवस्थानचा प्रसिद्ध होमकुंड जत्रोत्सव उत्साहात साजरा करण्यात आला. शेकडो धोंड भक्तगणांच्‍या साक्षीने देवीचे अग्निदिव्य पार पडले. देवस्थान समितीने प्रतिबंध केल्याने यंदा जत्रोत्सवात गोबी मंच्युरियनचे स्टॉल्‍स नव्‍हते.

जत्रोत्सवानिमित्त काल सोमवारी पहाटेपासून दुपारपर्यंत श्रींच्या मूर्तींस अभिषेक व अन्‍य धार्मिक विधी पार पडले. सायंकाळी नवीन धोंडगण मानवण्यात आले. रात्री ११ वाजता हरवळे येथील श्री देव रुद्रेश्वराकडून भेटीच्या रूपाने आलेल्या ओटीचा स्वीकार करण्यात आला. मध्यरात्री होमकुंड प्रज्वलित केल्यानंतर धोंडगणांचे स्नान करण्यासाठी सातेरी देवीच्या तळीवर प्रस्थान झाले.

आज मंगळवारी पहाटे श्री रवळनाथ व देवी महालक्ष्मीच्या कृपाप्रसादाने धोंडगणांनी रखरखत्या होमकुंडातून अग्निप्रवेश केला. नंतर श्रींचे अग्निदिव्य झाले. मंडपात सर्वांना कौल देऊन मुख्य जत्रोत्सवाची सांगता झाली. अग्निदिव्य पाहण्यासाठी भाविकांनी गर्दी केली होती.