डिचोली : महिलांना स्वयंपूर्ण आणि आत्मनिर्भर होण्यास मदत ठरु शकणारे 'सिटी लायव्हलीहूड सेंटर' डिचोलीत कार्यान्वित करण्यात आले आहे. राज्यातील पहिलेच असलेल्या या केंद्राचे सोमवारी (ता.27) सायंकाळी डिचोलीचे आमदार तथा सभापती राजेश पाटणेकर (Rajesh Patnekar) यांच्या हस्ते थाटात उदघाटन करण्यात आले. जी-सुडाच्या योजनेंतर्गत हे केंद्र सुरु करण्यात आले आहे.

उदघाटनानंतर बोलताना सभापती राजेश पाटणेकर यांनी केंद्र सुरु करण्याचा प्रथम मान डिचोली पालिकेला मिळाल्याबद्दल समाधान व्यक्त केले. या केंद्राच्या माध्यमातून महिला गटांना व्यासपीठ मिळणार असून, महिलांनी त्याचा पुरेपूर फायदा घ्यावा. असे आवाहनही सभापतींनी केले. या सेंटरसह विक्री दालनाचेही सभापती पाटणेकर यांच्या हस्ते उदघाटन करण्यात आले.

उदघाटन (Inauguration) सोहळ्यास डिचोलीचे नगराध्यक्ष कुंदन फळारी, पालिकेचे मुख्याधिकारी क्लेन मदेरा, नगरसेवक (Corporator) रियाज बेग, विजयकुमार नाटेकर, सुदन गोवेकर, निलेश टोपले, गुंजन कोरगावकर, ऍड. अपर्णा फोगेरी, ऍड. रंजना वायंगणकर, दीपा पळ आणि दीपा शिरगावकर यांच्यासह 'सुडा'ची प्रकल्प सल्लागार श्रीमती सेलसा आंतोन आणि व्हिन्सी, पालिकेचे अभियंता राजेश फडते, पालिकेच्या सामाजिक प्रकल्प समन्वयक अरुणा परबवाडकर आदी उपस्थित होते.

सेलसा आंतोन यांनी यावेळी बोलताना सेंटरचा उद्धेश आणि त्यापासून मिळणारे फायदे याविषयी माहिती देऊन, महिलांनी सरकारी योजनांचा लाभ घेण्यासाठी पुढे यावे. असे आवाहन केले. क्लेन मदेरा यांनी पालिकेच्या कार्याची स्तुती केली. कुंदन फळारी आणि अनिता परबवाडकर यांनी आपले विचार मांडले. दीपा शिरगावकर यांनी आभार मानले.

असे आहे केंद्र

पालिकेच्या (Municipality) सहकार्यातून फळ-भाजी बाजार संकुलात हे 'सिटी लायव्हलीहूड सेंटर' सुरु करण्यात आले आहे. या केंद्रासाठी जी-सुडाकडून 10 लाख रुपये अर्थसाहाय्य मंजूर झाले आहे. पालिका क्षेत्रातील नोंद असलेल्या महिला स्वयंसहाय गटांकडून तयार करण्यात येणारे खाद्यपदार्थ आणि अन्य वस्तूंना या केंद्राच्या माध्यमातून बाजारपेठ (Market) मिळणार आहे. यामुळे महिलांना स्वयंपूर्ण आणि आत्मनिर्भर होण्यास मदत होणार आहे.