Bicholim News : डिचोली,गव्याची धावत्या स्कूटरला धडक बसल्याने स्कूटरस्वार शुभम सुभाष माईणकर (रा. हळदणवाडी-मये) हा विवाहित युवक गंभीर जखमी झाला.

तर मागे बसलेली त्यांची पत्नी किरकोळ जखमी झाली. हा अपघात बुधवारी सायंकाळी उशिरा मये तलाव परिसरात घडला. जखमीवर सध्या गोमेकॉ इस्पितळात उपचार सुरू आहेत.

उपलब्ध माहितीनुसार, शुभम पत्नीसह आपल्या स्कूटर (जीए ११ बी-७२५२)वरून मयेहून डिचोलीकडे जात होते. मये तलावाकडील प्रवेशद्वारापासून साधारण ५० ते ६० मीटर अंतरावर स्कूटर पोहोचली असता, जवळच्या रानातून डाव्या बाजूने धावत आलेल्या गव्याची स्कूटरला जोरदार धडक बसली.

या धडकेबरोबर स्कूटरसह शुभम आणि त्यांची पत्नी रस्त्यावर फेकले गेले. रस्त्यावर आदळल्याने शुभम यांचे तोंड फुटले आणि रक्तस्त्राव सुरू झाला.

लागलीच त्याठिकाणी असलेले माजी सरपंच किशोर कारबोटकर, काजल कारबोटकर आणि इतरांनी मदतकार्य करून शुभमला सामाजिक आरोग्य केंद्रात नेण्याची व्यवस्था केली. आरोग्य केंद्रात प्राथमिक उपचारांनंतर त्यांना पुढील उपचारासाठी गोमेकॉत हलविण्यात आले.

मये तलाव परिसरात सध्या गव्यांचा संचार आणि धुमाकूळ वाढला आहे. हे गवे रात्रीच्यावेळी रस्त्यावर उभे असतात.