गोवा ही कलाकारांची खाण आहे. या मातीत अनेक बहुमूल्य असे कलाकार रुजलेले आहेत. कलकारांना वाव देण्यासाठी कला अकादमी सदैव तत्पर आहे. भजनी कला टीकवून ठेवण्याचे काम गेल्या ५० वर्षापासून कला अकादमी करत आली आहे. भजन ही गोव्याची ओळख आहे. ही संस्कृती टीकवून ठेवण्याचे महान कार्य कला अकादमी करत आहे, असे प्रतिपादन आमदार कृष्णा (दाजी) साळकर यांनी केले.

सोमवारपासून कला अकादमी आयोजित पं. मनोहरबुवा शिरगांवकर स्मृती विभागीय स्तरावरील भजन स्पर्धेला रवींद्र भवन, बायणा येथून प्रारंभ झाला. या केंद्र क्र. १ वरील स्पर्धेचा शुभारंभ आमदार कृष्णा साळकर यांच्या हस्ते दिपप्रज्वलन करून करण्यात आला. यावेळी कला अकादमीचे कार्यक्रम विकास अधिकारी प्रदीप गांवकर, रवींद्र भवन बायणाचे अध्यक्ष जयंत जाधव, परीक्षक दत्तू गावस, प्रसाद कळंगूटकर, गोकुळदास गावणेकर आदी मान्यवर उपस्थित होते.

साळकर पुढे म्हणाले की, भजन संस्कृती देवाकडे संवाद, भक्ती साधण्यासाठी उत्तम साधन आहे. ही आपली संस्कृती टिकवून ठेवण्यासाठी पुरुषांबरोबर महिलांचाही तितकाच मोठा सहभाग आहे. ताण तणाव हा मनुष्याचा अविभाज्य भाग आहे. तो दूर करण्यासाठी भजन हे उत्तम साधन आहे. आपली भजन संस्कृती टीकवून ठेवण्यासाठी प्रत्येकांनी सदैव पुढे यावे, असे आवाहन केले.

स्पर्धेचा शुभारंभ महिला कलाकारांच्या सादरीकरणाने झाला. पहिल्या सत्रात रुमडेश्वर दत्तात्रय सांस्कृतिक महिला मंडळ (रुमडावाडा), शिव समर्थ सांस्कृतिक मंडळ (वास्को), श्री तिरुपती बालाजी सांस्कृतिक संस्था (हेडलॅण्ड सडा), श्री ऋषी दत्तात्रय महिला भजनी मंडळ (ओरुले वास्को), स्वरब्रह्म संगीत सांस्कृतिक संस्थान (एलमोन्त), श्री दामोदर महिला भजनी मंडळ (मुर्डी, कासावली), गजानन भोगदेश्वर महिला भजनी मंडळ (बोगदा), श्री सातेरी महिला भजनी मंडळ (शिंदोळी, सांखवाळ) व श्री हनुमान महिला भजनी संस्कृत संस्था (नॉन मॉन-वास्को) ही पथके सहभागी झाली.

कार्यक्रम विकास अधिकारी प्रदीप गावकर यांनी प्रास्ताविक केले. यावेळी जयंत जाधव यांचेही समयोचित भाषण झाले. सूत्रसंचालन कार्यक्रम अधिकारी संजीव झर्मेकर यांनी केले.