फोंडा: बेतोडा येथील ‘लाईफलाईन'' म्हणून ओळखला जाणारा नाला प्रदूषित झाला असून या नाल्यात बिनधास्तपणे घातक रसायन सोडण्याचे प्रकार होत आहेत. या रसायनामुळे नाल्याचे पाणी काळे होऊन मासे मृतावस्थेत आढळले आहेत.

भयंकर रोगराई पसरण्यापूर्वी प्रदूषण नियंत्रण मंडळासह संबंधित खात्यांनी सखोल चौकशी करून दोषींवर कडक कारवाई करण्याची मागणी नागरिकांनी केली आहे. या नाल्यात घातक रसायन अधूनमधून सोडण्याचे प्रकार होतात. येथील काही उत्पादक कंपन्यांवर नागरिकांचा संशय आहे.

शिवाय दत्तगड येथील शौचालयांची घाण नाल्यात सोडण्याबरोबर काही कँटीनचेही दूषित पाणी नाल्यात सोडले जात असल्याचा संशय आहे. नाल्यातील प्रदूषित पाण्याचा फटका लगतच्या बागायतींना बसत असून त्यामुळे झाडे मरत आहेत. वास्तविक हे पाणी बेतोडा तसेच नागझरी - कुर्टीतील लोक आंघोळ करणे, कपडे धुणे तसेच इतर कामासाठी वापरतात. मात्र रसायन नाल्यात सोडल्याने या पाण्याचा वापर करणे धोक्याचे ठरले आहे.

मुख्यमंत्र्यांकडे तक्रार...

या नाल्याच्या दुर्दशेबाबत आणि घातक रसायन सोडण्याच्या प्रकाराची तक्रार महेश पणशीकर यांनी मुख्यमंत्री डॉ. प्रमोद सावंत यांच्याकडे केली आहे. जलस्त्रोत स्वच्छ साफ ठेवण्याची जबाबदारी सरकारची आहे. त्यामुळे मुख्यमंत्र्यांनी तात्काळ संबंधितांना आदेश द्यावेत. गेल्या वर्षी पंचसदस्य हरेश नाईक, महेश पणशीकर तसेच संदीप पारकर यांनी या नाल्यातील घाणीसंबंधी आवाज उठवला होता. त्यानंतर सरकारी सूत्रे हलली; पण नंतर काहीच झाले नाही.

सुटीच्या दिवसांत नाल्यात घाण...!

सुटीच्या दिवसांत बेतोड्यातील या नाल्यात घाण सोडली जाते. विशेषतः शनिवारी व रविवारी तसेच अन्य सुटीच्या दिवसांत नाल्यात रसायन की घाण सोडली जाते, त्याचा आधी तपास लावायला हवा. पाणी काळे होत असून त्याला दुर्गंधीही येत असल्याचे नागरिकांनी सांगितले.