काणकोण: बेंदूर्डे ते पोळे दरम्यानच्या २२ किलोमीटर लांबीच्या चारपदरी रस्त्याच्या बांधणीसाठी अडथळा ठरणारी झाडे हटवण्यास सुरुवात झाली आहे. बेंदूर्डे ते करमल घाटपर्यंतची सुमारे दीड हजार झाडे हटवण्यात येणार आहेत.

कापण्यात येणाऱ्या वृक्षांमध्ये जास्तीत जास्त निलगिरीची झाडे आहेत. त्याशिवाय सागवान आणि अन्य वृक्षांचाही समावेश आहे. मडगावहून येताना डाव्या बाजूला असलेली झाडे हटवण्यात येत आहेत. यावेळी वन अधिकारी उपस्थित होते. चारपदरी रस्त्यामुळे घाटातील वाहतूक सुरळीत होणार आहे.

हरियाणा येथील कुलूवाला कन्स्ट्रक्शन प्रायव्हेट लिमिटेडने ५९४.१८ कोटी रुपयांना ही निविदा स्वीकारली आहे. बेंदूर्डे ते बगल रस्ता हे अंतर १४.४९ किलोमीटर आहे, तर त्यानंतर माशे ते पोळेपर्यंतचे अंतर ७.६१ किलोमीटर आहे. त्यासाठी एकूण २ लाख ९२ हजार ३०८ चौरस मीटर जमीन संपादन करण्यात आली आहे. ऑक्टोबर महिन्यात प्रत्यक्ष कामाला सुरुवात होणार आहे. २०२९ पर्यंत महामार्गाचे काम पूर्ण होणार आहे.

काणकोणहून अर्ध्या तासात मडगाव

या महामार्गामुळे नागरिकांना काणकोणहून अर्ध्या तासात मडगाव, तर एका तासात पणजीला जाणे शक्य होईल. तसेच, अपघातांचे प्रमाणही कमी होणार असल्याचे मंत्री रमेश तवडकर यांनी सांगितले.

काणकोण ते मडगाव एकोणीस बसथांबे

दोन वर्षांत या चारपदरी रस्त्याचे काम पूर्ण करण्यात येणार आहे. या महामार्गामुळे काणकोण ते मडगाव प्रवास सुलभ होणार आहे. या मार्गावर एकोणीस बसथांबे आणि प्रसाधनगृहे असणार आहेत.