मडगाव : पश्चिम बगल रस्त्याचा राहिलेला एक किलोमीटर अंतराचा रस्ता स्टिल्टवर बांधण्यात येणार, असं आश्वासन काल मुख्यमंत्री प्रमोद सावंत यांनी दिलं होतं. असं असलं तरीही बाणावली भागात या रस्त्यासाठी शेतजमिनीत मातीचे भराव घालणे चालूच आहे. त्यामुळे या भागातील नागरिकांमध्ये पुन्हा चिंतेचं वातावरण आहे. दरम्यान मातीच्या भरावामुळे पावसात वाहून जाणारे पाणी अडून शेतीचं होऊ नये यासाठी सरकारची मनोवृत्ती बदलावी यासाठी आज स्थानिकांनी प्रार्थनाही केल्या.

फातोर्डा मतदारसंघाचे आमदार आणि गोवा फॉरवर्डचे (Goa Forward) नेते विजय सरदेसाई यांनी काल बुधवारी विधानसभेत उपस्थित केलेल्या प्रश्नाला उत्तर देताना मुख्यमंत्री प्रमोद सावंत यांनी एक किलोमीटर अंतराचा पट्टा स्टिल्टवर बांधण्यात येणार, असे सांगितले होते. मात्र असे असतानाही आज या भागात मातीचे भराव घालण्याचे काम चालूच होते. त्यामुळे मुख्यमंत्र्यांच्या (CM) आश्वासनानंतरही काम कसं सुरु असा सवाल स्थानिकांनी विचारला आहे.

हा रस्ता स्टिल्टवर बांधावा अशी मागणी घेऊन राष्ट्रीय हरित लवादा (एनजीटी) कडे जाणाऱ्या पर्यावरण कार्यकर्त्या रॉयला फर्नांडिस यांनी आमचा मुख्यमंत्री प्रमोद सावंत (Pramod Sawant) यांच्या आश्वासनावर विश्वास आहे. मात्र आमचा कायदेशीर लढा चालूच राहील. मी लवादासमोर जी याचिका दाखल केली होती, तिचा निर्णय अजून लागायचा आहे. ही याचिका जलदगतीने निकाली काढावी यासाठी मी पुन्हा लवादासमोर अर्ज सादर केला आहे, असे त्यानी सांगितले आहे.

दरम्यान हे काम सुरु करताना राष्ट्रीय हमरस्ता प्राधिकरणाने आपल्या मालकीच्या शेत जमिनीत अतिक्रमण केल्याचा आरोप बाणावली येथील एका शेतकऱ्याने केला असून त्याविरोधात त्याने प्राधिकरणाकडे दाद मागितली आहे.