Illegal Alcohol Smuggling

बेळगाव: पोलिसांनी मोठी कारवाई करत गोवा बनावटीचा साठवून ठेवलेला मद्यसाठा जप्त केला आहे. खडेबाजार परिसरात पोलिसांनी ही धडक कारवाई केली. पोलिसांनी संशयित आरोपीला अटक केली असून, १०.३० लाखांचा मुद्देमाल जप्त केला आहे. होळीच्या तोंडावर ही मोठी कारवाई मानली जात आहे.

राकेश अनिक चौगले (वय ३०, रा. न्यू गडशेड रोड, बेळगाव) असे अटक करण्यात आलेल्या संशयित आरोपीचे नाव आहे. त्याच्याकडून ३७० लिटर गोवा बनावटीचे मद्य जप्त करण्यात आले आहे. याची बाजारातील किंमत ७.३० लाख रुपये असल्याचे सांगितले जाते. याशिवाय पोलिसांनी कर्नाटक परवाना असलेली एक वाहन देखील जप्त केले आहे. असा एकूण १०.३० लाख रुपयांचा मुद्देमाल जप्त करण्यात आला आहे.

राकेश चौगले याने मोठ्या प्रमाणावर गोवा बनावटीचा मद्यसाठा जमा करुन ठेवल्याची माहिती बेळगाव शहर पोलिसांना मिळाली होती. पोलिसांनी तात्काळ याची दखल घेत खडेबाजार परिसरात छापेमारी करत दारुसह १०.३० लाख रुपयांचा मुद्देमाल जप्त केला. याप्रकरणी बेळगाव पोलिस अधिक तपास करत आहेत. आगामी होळीच्या तोंडावर ही कारवाई मोठी मानली जात आहे.