मडगाव: गेल्या काही वर्षांत पश्चिम आशिया, मध्य पूर्व, युरोप आणि आफ्रिकेतील निर्यातीत वाढ झाल्यामुळे गोव्यातील गोमांस स्थानिक बाजारपेठेत तीव्र टंचाई निर्माण झाली आहे.

निर्यातीत अचानक वाढ झाल्यामुळे गोव्यात गोमांसाची मोठी टंचाई निर्माण झाली आहे. यामुळे गोमांसच्या किमतीत मोठ्या प्रमाणात वाढ करण्यात आली आहे. किमती वाढल्यामुळे ग्राहक आणि रेस्टॉरंट मालकांमध्येही मोठ्या प्रमाणात निराशा निर्माण झाली आहे.

राज्यात पुन्हा एकदा निर्माण झालेल्या या टंचाईमुळे गोमांस पुरवठ्यात अडथळा निर्माण झाला आहे, ज्यामुळे साठ्याच्या कमतरतेमुळे अनेक मांस स्टॉल बंद करावे लागले आहेत. गोवा मीट कॉम्प्लेक्समध्ये गेल्या दोन दिवसांत कत्तलीसाठी एकही प्राणी आणण्यात आला नाही, ज्यामुळे समस्या आणखी वाढली आहे.

"निर्यातीचे प्रमाण पाहता स्थानिक पातळीवर कत्तलीसाठी कमी प्राणी उपलब्ध आहेत. कत्तलीसाठी अतिरिक्त जनावरे उपलब्ध करून देऊन ही समस्या सोडवण्यासाठी प्रयत्न सुरू आहेत. लवकरच गोमांस पुरवठा पुन्हा सुरू होईल," असं आश्वासन ऑल गोवा बीफ ट्रेडर्स असोसिएशनचे उपाध्यक्ष शब्बीर बेपारी यांनी 'हेराल्ड' या वृत्तसंस्थेशी बोलताना दिलं आहे.

'हेराल्ड' या वृत्तसंस्थेशी बोलताना गोमांस कॉम्प्लेक्सचे व्यवस्थापकीय संचालक डॉ. राजेश केनी गोमांस कमतरतेबाबत म्हणाले, "आम्ही प्राण्यांच्या कत्तलीसाठी आवश्यक पायाभूत सुविधा पुरवतो. कंत्राटदार व्यापाऱ्यांच्या आदेशानुसार प्राण्यांची कत्तलीची व्यवस्था करतो. आमच्या सेवांमध्ये कोणतीही अडचण नाही," असं डॉ. केनी यांनी स्पष्ट केले.

भारत जागतिक स्तरावर पशु उत्पादनांच्या बाजारपेठेत महत्त्वाची भूमिका बजावत आहे. २०२३-२४ मध्ये, भारताची पशु उत्पादन निर्यात ३७,६६५.५१ कोटी रुपये होती. ज्यामध्ये म्हशीचे मांस ३१,०१० कोटी रुपये होते, जे एकूण निर्यातीच्या ८२ टक्क्यांहून अधिक आहे.