Harvard University: गोवा सरकारचा हार्वर्ड विद्यापीठासोबत ऐतिहासिक करार! विद्यार्थी व शिक्षकांसाठी 'लीडरशीप प्रोग्रॅम'

Harvard University program for scientifically inspired leadership in Goa

पणजी: हार्वर्ड विद्यापीठाच्या सहकार्याने ‘प्रोग्राम फॉर सायंटिफिकली - इंस्पायर्ड लीडरशिप’ हा उच्च दर्जाचा शैक्षणिक कार्यक्रम राज्यातील उच्च माध्यमिक विद्यार्थ्यांसाठी आणि शिक्षकांसाठी राबवण्यात येणार आहे. या कार्यक्रमामुळे विद्यार्थ्यांना शास्त्रीय पद्धतीवर आधारित आंतर सांस्कृतिक शिक्षणाचा अनुभव मिळेल.

हा अभ्यासक्रम लिबरल आर्ट्स आणि सायन्स फिलॉसॉफीवर आधारीत असून १० नंतर विशिष्ट प्रवाह निवडणाऱ्या विद्यार्थ्यांना त्यापलीकडील कौशल्ये व ज्ञान मिळवण्याची संधी देणार आहे.

राज्य सरकारने हार्वर्ड विद्यापीठासोबत ऐतिहासिक सामंजस्य करार केला आहे. हा करार करतेवेळी मुख्यमंत्री डॉ. प्रमोद सावंत, हार्वर्ड विद्यापीठाचे प्रतिनिधी डॉ. डॉमिनिक माओ आणि डॉ. अँड्रिया राईटउपस्थित होत्या.

‘वंचित विद्यार्थ्यांना होणार फायदा’

मुख्यमंत्री म्हणाले की, ‘प्रोग्राम फॉर सायंटिफिकली - इंस्पायर्ड लीडरशिप’ हा उपक्रम तीन वेगवेगळ्या गटांना एकत्र आणेल. हार्वर्ड विद्यापीठातील महाविद्यालयीन विद्यार्थी प्रशिक्षकाची भूमिका निभावतील; गोव्यातील महाविद्यालयीन विद्यार्थी साहाय्यक प्रशिक्षक म्हणून काम करतील आणि गोव्याच्या शिक्षण विभागांतर्गत सार्वजनिक शाळांमधील उच्च माध्यमिक विद्यार्थी या कार्यक्रमाचे मुख्य लाभार्थी असतील. ही भागीदारी शैक्षणिक उत्कृष्टता, नेतृत्व विकास आणि सर्वांना समान संधी उपलब्ध करून देण्याच्या दिशेने एक महत्त्वपूर्ण पाऊल आहे. या मुळे वंचित विद्यार्थ्यांना मोठा फायदा होणार आहे.

‘गरीब विद्यार्थ्यांसाठी मोठी संधी’

हार्वर्ड विद्यापीठातील डॉ. डॉमिनिक माओ व चारुदत्त यांनी सांगितले की, हार्वर्डमध्ये फक्त श्रीमंत लोक प्रवेश मिळवतात हा एक मोठा गैरसमज आहे. येथे आर्थिक गरज लक्षात घेऊन शिष्यवृत्ती दिली जाते, हे कळल्यावर गोव्यातील विद्यार्थ्यांना नवीन दृष्टिकोन मिळेल. हा उपक्रम गोव्याच्या गरीब आणि होतकरू विद्यार्थ्यांसाठी एक मोठी संधी ठरणार आहे.