Mapusa Municipal Council: नगरसेवक तारक आरोलकर यांनी दिलेला जातीचा दाखला बार्देश उपजिल्हाधिकारी गुरुदास देसाई यांनी रद्द केला आहे. समाज कल्याण विभागाच्या छाननी समितीच्या निर्देशानंतर उपजिल्हाधिकाऱ्यांनी दाखला रद्द केला.

माजी नगरसेवक फ्रँकी कार्व्हालो यांनी याप्रकरणी समाजकल्याण विभागाच्या तीन सदस्यीय छाननी समितीकडे धाव घेत तक्रार केली होती. यानंतर ही कारवाई करण्यात आली.

एप्रिल 2021च्या म्हापसा पालिका निवडणूकीत आरोलकरांनी ओबीसीचे खोटे प्रमाणपत्र सादर करुन ही निवडणूक लढवली होती. त्यानंतर, म्हापसा पालिकेच्या प्रभाग 7मधून आरोलकर ओबीसी आरक्षित प्रभागातून जिंकून आले होते.

माजी नगरसेवक फ्रँकी कार्व्हालो यांनी आरोलकर यांच्या विरोधात छाननी समितीकडे तक्रार केली होती. याप्रकरणी छाननी समितीने निवाडा देत म्हटले होते की, "म्हापसा पालिकेचे नगरसेवक तारक आरोलकर यांनी सादर केलेले कथित ओबीसी प्रमाणपत्र हे पडताळले गेले नाही. त्यामुळे बार्देश उपजिल्हाधिकार्‍यांनी सदर प्रमाणपत्र रद्द करावे." 

समितीच्या निर्देशानंतर उपजिल्हाधिकाऱ्यांनी दाखला रद्द केला. दरम्यान तारक आलोरकरांचा दाखला रद्द झाल्याने आता आरोलकरांचे पद धोक्यात आल्याचे चित्र दिसत आहे.