पणजी: तब्बल १२ वर्षे फरार असलेल्या १७ कोटींच्या बँक फसवणूक प्रकरणातील मुख्य संशयित आशुतोष पंडित याला अखेर केंद्रीय तपास यंत्रणेने अटक केली.

पुण्यातील हाऊस ऑफ लॅपटॉप्स (इंडिया) प्रा. लि. या कंपनीचा संचालक असलेला आशुतोष बांबोळी परिसरात यतीन शर्मा हे बनावट नाव धारण करून राहात होता.

मात्र, अत्याधुनिक डिजिटल विश्लेषण आणि गुप्तचर यंत्रणांच्या समन्वयाने ‘सीबीआय’ने ही कारवाई करत आर्थिक गुन्हेगारी विश्‍वातील या चतुर ‘लखोबा लोखंडे’ला अखेर गजाआड केले. आशुतोष कळंगुट येथील एका नाईट क्लबमध्ये सीईओ होता.

ओळख पुसण्याचा होता त्याचा डाव

आशुतोषने केवळ लपण्याचा नव्हे, तर स्वतःची ओळखच पुसून टाकण्याचा डाव आखला होता. यतीन शर्मा या नावाने त्याने गोव्यात नव्याने पॅन कार्ड, आधार कार्ड आणि पासपोर्टही मिळवला. पहिला पासपोर्ट नवी दिल्ली, नंतर गोव्यात नूतनीकरण करून त्याने ओळख बळकट केली. गोव्यात आल्यानंतर त्याने सामाजिक वावर अत्यंत कमी ठेवला. एप्रिल २०१८ मध्ये पुण्यातील सीबीआय विशेष न्यायालयाने त्याला फरार घोषित केले होते.

अत्युच्च तंत्रज्ञानामुळे कारनामा उघड:

तंत्रज्ञानावर आधारित तपासामुळे अखेर आशुतोषच्या या बनावट कारनाम्याचा अंत झाला. ‘नेटग्रीड’ या गुप्तचर प्रणालीने विविध डेटाबेसमधील माहिती एकत्र करत यतीन शर्माची माहिती गोळा केली. विविध राज्यांमधील कागदपत्रे, प्रवास तपशील आणि बायोमेट्रिक माहिती यांच्या अभ्यासातून यतीन शर्मा म्हणजेच फरार आशुतोष असल्याचे स्पष्ट झाले. या तांत्रिक माहितीनंतर सीबीआयने १८ डिसेंबर रोजी बांबोळी येथे छापा टाकून त्याला अटक केली.