Banastarim Mercedes Accident: क्राईम ब्रँचने या अपघाताबाबतचा सविस्तर अहवाल 60 दिवसात मोटर अॅक्सिडेंट क्लेम ट्रिब्युनलकडे सोपवावा, असे आदेश हायकोर्टाने दिले आहेत. या ट्रिब्युनलकडे या अपघातातील मर्सडीज कार ज्यांच्या मालकीची आहे, त्या मेघना परेश सावर्डेकर यांनी 2 कोटी रूपये यापुर्वीच जमा केले आहेत.

(Bombay High Court Goa Bench)

या अपघातात दिवार येथील फडते कुटूंबातील दोघांचा मृत्यू झाला होता तर अरूप करमरकर याचाही मृत्यू झाला होता. या दोन्ही कुटूंबांना प्रत्येकी प्रत्येकी 50 लाख रूपये द्यावेत, असे कोर्टाने म्हटले आहे.

तसेच अपघातातील जखमी आणि ज्यांना आता लकवा मारल्याने कायमस्वरूमी अंथरूणाला खिळलेले शंकर हळर्णकर यांना 40 लाख रूपये द्यावेत. तसेच अपघातातील आणखी एक जखमी वनिता भंडारी यांना 35 लाख रूपये द्यावेत.

वनिता भंडारी या देखील या अपघातात गंभीर जखमी झाल्या असून त्या आता अंथरूणाला खिळून असणार आहेत. 8 महिन्यांनंतर त्यांच्यावर शस्त्रक्रिया होणार आहे, त्यानंतर त्या स्वतःच्या पायावर उभा राहू शकतील की नाही, ते कळणार आहे.

शिवाय अपघातातील मृत अरूप करमरकर यांच्याशी वनिताचे लग्न ठरले होते.

तसेच या अपघातातील आणखी एक जखमी राज माजगावकर यांना 25 लाख रूपये द्यावेत, असे आदेश हायकोर्टाने दिले आहेत.

दरम्यान हायकोर्ट आज, बुधवारी या प्रकरणातील मेघना सावर्डेकर हिच्या याचिकेवर सुनावणी घेणार आहे. मार्दोळ पोलिसांनी बजावलेल्या समनला आव्हान देणारी याचिका मेघना सावर्डेकर हिने दाखल केली होती.