वास्को ता, २६ (प्रतिनिधी): बायणातील दरोड्याचा अवघ्या आठ दिवसांत मुरगाव पोलिसांनी इतर पोलिसांच्या सहकार्याने छडा लावला. या प्रकरणात चामुंडा आर्केड इमारतीनजीक भेळपुरी, पाणीपुरीची हातगाडी लावणारा मुख्य सूत्रधार असल्याचे समजते. दरम्यान, पोलिसांनी या प्रकरणातील मूळच्या ओडिशातील ६ संशयितांना महाराष्ट्र व ओडिशा राज्यातून अटक केल्याचे पोलिस सूत्रांनी सांगितले.

पोलिसांनी कौतुक करावेसे वाटते

दरोड्याचा छडा लावल्याबद्दल दरोड्यातील पीडित सागर नायक यांनी आनंद व्यक्त केला. गोवा पोलिसांच्या कर्तबगारीवर आपला १०१ टक्के विश्वास होता , तथापि सदर प्रकरणाचा छडा लागण्यास सहा सात महिने लागतील, असे वाटत होते. मात्र एवढ्या लवकर छडा लावल्याबद्दल पोलिसांनी कौतुक करावेसे वाटते, असे दरोड्यातील पीडित सागर नायक म्हणालेत.

या दरोड्याप्रकरणी पोलिसांनी मूळचे ओडिशाचे असलेल्या सहाजणांना बंगळुरू येथे अटक केली आहे. त्यांच्याकडून काही ऐवज जप्त करण्यात आला आहे. बेंगळुरू येथे सहा जणांना ताब्यात घेऊन लुटलेल्या ऐवजातील बराचसा ऐवज हस्तगत करण्यात आल्याची माहिती सागर नायक यांना मिळाल्यावर त्यांनी आनंद व्यक्त केला.

याप्रकरणी मुख्यमंत्री डॉ. सावंत, पोलिस महासंचालक, महानिरीक्षक उपमहानिरीक्षक, दक्षिण गोव्याचे अधीक्षक, वास्कोचे उपअधीक्षक गुरुदास कदम, निरीक्षक वैभव नाईक, निरीक्षक जॅकीस शेरीफ व इतर पोलिसांचे आभार मानतो, असे सागर नायक यांनी सांगितले.

असा पडला होता दरोडा

बायणातील चामुंडा आर्केडच्या सहा मजल्यावर राहणारे सागर नायक यांच्या प्लॅटवर सात-आठ जणांनी दरोडा घातला होता. यावेळी त्यांनी सागर नायक यांच्या डोक्यावर लोखंडी कांबीने प्रहार करून रक्तबंचाळ केले होते.

सागर यांची पत्नी हर्षा, मुलगी नक्षत्रा यांनाही मारहाण करण्यात आली होती. त्यानंतर त्यांचे हातापाय बांधून त्यांच्या तोंडात कापडाचा बोळा घालून दरोडेखोर सोन्या-चांदीचे दागिने व रोकड असा मोठा ऐवज घेऊन पळाले होते. त्यांनी अगदी नियोजनबध्दरित्या हा दरोडा घातला होता.