पणजी : दोन वर्षापूर्वी तोर्डा-पर्वरी येथे घडलेल्‍या विलास मेथर जळीत हत्याकांड प्रकरणातील मुख्य सूत्रधार अल्ताफ यरगट्टी याला सर्वोच्च न्यायालयाने सशर्त जामीन मंजूर केला आहे. उत्तर गोव्यात त्याला प्रवेश नाकारताना फक्त सुनावणीवेळी न्यायालयात हजर राहण्यास मुभा दिली आहे. घटनेनंतर दोन वर्षांनी त्याला जामीन मिळाला आहे.

याप्रकरणी पोलिसांनी न्यायालयात आरोपपत्र सादर केले असून त्यावरील सुनावणी सुरू झाली आहे. विलास मेथर खूनप्रकरणी पोलिसानी सातजणांविरोधात खून व कटकारस्थानच्या आरोपाखाली गुन्हे दाखल केले आहेत. संशयित अल्ताफ याने सत्र व उच्च न्यायालयामध्ये जामिनासाठी केलेले अर्ज फेटाळण्यात आले होते. तो या खूनप्रकरणातील प्रमुख सूत्रधार असल्याने त्याला या दोन्ही न्यायालयांनी (court) जामीन नाकारला होता.

पोलिसांनी सादर केलेल्या आरोपपत्रात 71 साक्षीदार असून आरोपपत्र 508 पानांचे आहे. या प्रकरणाचा तपास पर्वरीचे तत्कालीन पोलिस (police) निरीक्षक निनाद देऊलकर यांनी केला होता.

संशयितांमध्ये अल्ताफ येरगट्टी, सय्‍यद शेख, पवन बडिगर, इक्बाल नानपुरी, संतोष पिल्लई, शैलेश शेट्टी व विश्‍वजीत दाबोळकर यांचा समावेश आहे. सहा संशयितांना जामीन मिळाला होता, मात्र अल्ताफ येरगट्टी याला तो मिळाला नव्हता. अल्ताफ यानेच विलास मेथर याच्याशी असलेल्या दुश्‍मनीमुळे त्‍याचा काटा काढण्यासाठी तिघा संशयितांना सुपारी दिली होती. त्यानुसार पूर्वनियोजन करून मेथर याला रस्त्यात अडवून बडिगर, नानपुरी व दाबोळकर या तिघांनी त्याच्या अंगावर जळीत द्रव्य टाकून जखमी केले होते व तेथून पळ काढला होता. विलासचा इस्पितळात उपचार सुरू असताना त्‍याचा मृत्यू (Death) झाला होता.

...म्‍हणून काढला होता काटा!

विलास मेथर ज्या साल्वादोर-द-मुंद येथील इमारतीत राहत होता, त्या इमारतीच्‍या छपरावर बेकायदेशीर बांधकाम करण्यात आले होते. विलासने माहिती हक्क कायद्याखाली त्याबाबतची माहिती मिळवून पंचायत तसेच ‘रेरा’कडे त्‍याविरोधात तक्रारी दाखल केल्या होत्या. त्यात अल्ताफ येरगट्टी याचा उल्लेख केला होता. विलास मेथर हा या बेकायदेशीर कामामध्ये येरगट्टी याला अडथळा बनत होता. म्‍हणून त्‍याचा काटा काढण्‍याचा कट शिजला होता.