Baharain-Goa Flight: उत्तर गोव्यातील मोपा येथील मनोहर आंतरराष्ट्रीय विमानतळ सुरू झाल्यावर दक्षिण गोव्यातील दाबोळी विमानतळाचे काय होणार हा प्रश्न गोव्यातील सर्वांनाच सतावत होता. तथापि, राज्य सरकारने वारंवार दाबोळी विमानतळ कार्यरत राहिल, असे स्पष्ट केले होते. त्याचीच प्रचिती एका नव्या माहितीमुळे येत आहे. या माहितीनुसार आता आखाती देशातून थेट गोव्यातील दाबोळीत विमानसेवा सुरू होणार आहे. गल्फ एअरने याबाबत घोषणा केली आहे.

आखाती देश असलेल्या बहारीन मधून गोव्यातील दाबोळीत थेट विमानसेवा सुरू होणार आहे. गल्फ एअर ही बहारीनची सरकारी मालकीची विमानसेवा कंपनी आहे. मार्च महिन्यापासून या सेवेला सुरूवात होणार आहे. विशेष म्हणजे, आठवड्यातील 4 दिवस ही सेवा असणार आहे. 27 मार्चपासून या विमानसेवेला सुरूवात होईल.

या घोषणेमुळे दोन लाभ होणार आहेत. एकतर गोव्यातून थेट आखाती देशांमध्ये जाता येणे शक्य होणार आहे. तसेच दाबोळी विमानतळावर हे विमान उतरणार असल्याने मोपा येथील मनोहर आंतरराष्ट्रीय विमानतळासह दाबोळी विमानतळही पूर्ण क्षमतेने पूर्ववत कार्यरत राहणार आहे.