पिळगाव पंचायत क्षेत्रातील बागवाडा भागात पुराच्या पाण्याने वेढा घातल्याने एका बालकांसह नऊजण घरात अडकून पडले. यात महिलांचाही समावेश होता. डिचोली अग्निशमन दलाने अडकून पडलेल्या नऊ जणांची सुखरुप सुटका केली. या नऊही जणांचे बागवाडा येथील सरकारी शाळेत स्थलांतर करण्यात आले आहे.

दरम्यान, गुरुवारी दुपारी अचानक बागवाडा येथील नदीतील पाण्याने पातळी ओलांडल्याने येथील चार-पाच घरांना पुराच्या पाण्याने वेढा दिला. त्यामुळे घरात असलेल्या महिलांवर आकांत कोसळला. यात तीन बालकांचाही समावेश होता. अग्निशमन दलाला माहिती मिळताच जवानांनी मोटरबोटसह येथे दाखल झाले. अधिकारी राहुल देसाई यांच्या मार्गदर्शनाखाली जवानांनी नऊजणांची सुखरुप सुटका केली.

पुरामुळे घरात अडकलेल्या काजूमळ-कारापूर येथील एका महिलेची सुखरुप सुटका करण्यात आली. मयेचे आमदार प्रेमेंद्र शेट यांनी परिस्थितीची पाहणी केली.

तीन मुलांसह महिलांचाही समावेश

बागवाडा येथील पुरात अडकलेल्या नऊजणांची सुटका करण्यात आली. यात ज्योती नाईक (60), लीलावती साळगावकर (65), अंकुश पेडणेकर (72), प्रगती पेडणेकर (42), संजना पेडणेकर (40), नीता पेडणेकर (30), साईज्ञा पेडणेकर (5), समर्थ पेडणेकर (5) आणि श्रीराज पेडणेकर (2) यांचा समावेश होता.