म्हापसा : बागा-कळंगुट येथे दोन दुचाकींची समोरासमोर धडक होऊन झालेल्या भीषण अपघातात दोन तरुणांचा मृत्यू झाला. अनिल उग्रेजिया (वय २७, मूळ गुजरात, सध्या रा. कांदोळी) आणि अरुण गोडीचा (वय २६, रा. गिरी) अशी मृतांची नावे आहेत. या अपघातात ठाणे-मुंबई येथील शशांक जाधव (वय ३६ वर्षे) आणि श्रीजी नायर (वय ३३ वर्षे) हे दोघे जखमी झाले आहेत.

हा अपघात रविवारी (ता. २६) पहाटे ५.१५च्या सुमारास बागा येथील हॉटेल रॉनिलजवळ घडला. अरुण गोडीचा आणि अनिल उग्रेजिया हे दोघेही जीए-०३-एक्यू-६६०२ क्रमांकाच्या दुचाकीवरून कळंगुटहून बागाच्या दिशेने जात होते. त्याचवेळी जीए-०७-एजे-३८७२ क्रमांकाच्या स्कूटरवरून शशांक जाधव आणि श्रीजी नायर हे विरुद्ध दिशेने येत होते. बागा येथे शशांक याने समोरून येणाऱ्या अनिलच्या दुचाकीला जोरदार धडक दिली.

या अपघातात चौघेही दुचाकीस्वार गंभीर जखमी झाले. जखमी अनिलला पोलिसांनी तातडीने कांदोळी आरोग्य केंद्रात दाखल केले. मात्र, डॉक्टरांनी त्याला मृत घोषित केले. इतर तिन्ही जखमींना रुग्णवाहिकेतून गोमेकॉत हलविले. तेथे उपचार सुरू असतानाच दुपारी अरुणचा मृत्यू झाला. अन्य दोन जखमी शशांक आणि श्रीजी यांना प्राथमिक उपचारानंतर डिस्चार्ज देण्यात आला.

मुंबईच्या दुचाकीस्वारावर गुन्हा दाखल

कळंगुटचे पोलिस उपनिरीक्षक स्नेहल मळीक आणि साहाय्यक उपनिरीक्षक रवी गावस यांनी घटनास्थळी पंचनामा केला. पोलिसांनी या अपघातास कारणीभूत ठरलेला चालक शशांक जाधव याच्याविरुद्ध भारतीय न्यायसंहिता आणि मोटार वाहन कायद्याच्या विविध कलमान्वये सदोष मनुष्यवधाचा गुन्हा दाखल केला आहे. पोलिस या प्रकरणाचा अधिक तपास करत आहेत.