सासष्टी: भारतीय जनता पक्षाने आपल्यावर मडगावची जबाबदारी सोपवली आहे व त्यासाठी आगामी निवडणुकीसाठी मडगावची उमेदवारी देऊ केली आहे. मडगावला गतवैभव मिळवून देण्यास माझे सदैव प्राधान्य राहील. मडगाव ही माझी जन्म व कर्म भूमी. मी इथेच लहानाचा मोठा झालो. तेव्हा मठग्रामस्थांनी मला परका मानू नये व गत 20 वर्षांत जी प्रगती झाली नाही ती करून दाखविण्यास आपल्याला पाठिंबा द्यावा. पक्षाच्या मडगावातील कार्यकर्त्यांनी आपल्याला पूर्ण सहकार्य करावे, असे आवाहन उपमुख्यमंत्री व मडगावचे भारतीय जनता पक्षाचे उमेदवार मनोहर ऊर्फ बाबू आजगावकर यांनी केले.

निवडणुकीच्या (Goa assembly) तयारीचा आढावा घेण्यासाठी मडगावात बीपीएस क्लबमध्ये भाजप मंडळाने कार्यककर्त्यांची बैठक बोलावली होती, तेव्हा आजगावकर बोलत होते. या बैठकीला मंडळाचे पदाधिकारी, महिला व युवा मोर्चाचे, बुथ प्रमुख उपस्थित होते. पक्षाचे प्रतिनिधी म्हणून माजी खासदार नरेंद्र सावईकर उपस्थित होते.

आपली राजकीय कारकीर्द मडगावमधूनच (Margao) सुरू झाली. नगरसेवक असताना माझ्या प्रभागमधील लोकांच्या समस्या दूर करण्यासाठी मी सदैव झटलो. मडगावचे सध्याचे आमदार मुख्यमंत्री असतानासुद्धा मडगावचा विकास करू शकले नाहीत. विकास म्हणजे काय हे दाखविण्याची संधी आपल्याला मडगावकरांनी द्यावी असेही आजगावकर यांनी सांगितले. आपण पेडणे व धारगळचा चांगल्यापैकी विकास केला आहे. मडगावबद्दल मला आस्था व अभिमान आहे, असेही आजगावकर यांनी सांगितले.