Babu Ajgaonkar: दवर्ली पंचायत क्षेत्रात बांधलेल्या 165 बेकायदेशीर घरांना पंचायतीने घर क्रमांक द्यावेत, यासाठी माजी आमदार बाबू आजगावकर हे सरपंच हर्क्युलान नियासो यांच्यावर दबाव आणत असून त्यांना ते धमकी देत असल्याचा आरोप भाजपचे एसटी नेते अँथनी बार्बोझा यांनी केला आहे. आजगावकर यांची ही दादागिरी खपवून घेणार नाही, असा इशाराही त्यांनी दिला आहे.

दवर्ली पंचायत क्षेत्रात बांधलेली ही घरे पूर्णतः बेकायदेशीर आहेत. त्यांच्याकडे घराच्या मालकीची कुठलीही कागदपत्रे नाहीत. अशा घरांना कायदेशीर करावे, अशी मागणी आजगावकर कसे करू शकतात, असा प्रश्र्न बार्बोझा यांनी केला.

ही बेकायदा घरे बिगर गोमंतकीयांची असून त्यांच्यासाठी आजगावकर मूळ गावकर असलेल्या सरपंचांवर दबाव का आणतात, असा सवालही त्यांनी केला आहे.

दवर्ली येथील एका वाड्यावर ही घरे असून दुसऱ्यांच्या जमिनीवर अतिक्रमण करून ती बांधली आहेत. या घरांना पंचायतीने घर क्रमांक द्यावेत, असे अर्ज 165 जणांनी केले होते. मात्र, त्यांच्याकडे घरमालकी सिद्ध करणारी कोणतीही कागदपत्रे नाहीत.