Ayush Health Services Goa

रायबंदर येथे आयुष आरोग्य सेवांचे उद्घाटन करण्यात आले. आयुष मंत्रालयाचे केंद्रीय मंत्री सर्बानंद सोनवाल आणि मुख्यमंत्री प्रमोद सावंत यांच्या हस्ते आज (दि.14) हे उद्धाटन करण्यात आले.

याठिकाणी युनानी क्लिनिक, क्लिनिकल संशोधन, सिद्ध क्लिनिकल संशोधन केंद्र, होमिओपॅथीचे क्लिनिकल संशोधन केंद्र आणि आयुर्वेद संशोधन (खनिज आणि सागरी) यांचा समावेश आहे.

शुक्रवारी दुपारी पार पडलेल्या या उद्धाटन संमारंभाला केंद्रीय मंत्री सोनवाल आणि मुख्यमंत्री सावंत यांच्यासह केंद्रीय राज्यमंत्री श्रीपाद नाईक आणि राज्याचे आरोग्यमंत्री विश्वजीत राणे उपस्थित होते.

अ‍ॅलोपॅथी उपचारपद्धतीने जुनाट आजार बरे होत नसतील तर, अशा लोकांनी आयुष आरोग्य केंद्राला भेट देऊन उपचार घेऊ शकतात. असे मुख्यमंत्री प्रमोद सावंत यावेळी म्हणाले.

तसेच, नव्याने उदघाटन झालेले आयुष आरोग्य सेवा केंद्र 'स्वस्थस्य स्वास्थ्यरक्षणम् अतुरस्य विकारप्रशमनम् च' म्हणजे आयुष केंद्र औषधाच्या प्रतिबंधात्मक तसेच उपचारात्मक पैलूंवर लक्ष केंद्रित करेल. असा विश्वासही सावंत यांनी व्यक्त केला.

'गोवा राज्यात या संशोधन संस्था स्थापन केल्याबद्दल मी केंद्रीय आयुष मंत्रालयाचे आभार मानतो. गोवा आयुष हेल्थकेअर हब बनण्याच्या दिशेने पुढे येत आहे. या संस्थांसह गोव्याने भारतातील वैद्यकीय पर्यटन केंद्र बनण्यासाठी एक पाऊल पुढे टाकले आहे.' असे सावंत म्हणाले

गरजू सर्वसामान्य लोकांसाठी ओपीडी, दवाखाना, पंचकर्म याबाबत तरतूद करण्यात आली आहे. खनिज आणि सागरी औषधांवर लक्ष केंद्रित करून संशोधन करण्यासाठी प्रयोगशाळा, संग्रहालय आणि ग्रंथालय देखील या परिसरात विकसित केले जात आहे.