डिचोली: येथे आयुर्वेदिक आणि ॲलोपॅथिक औषधोपचार रुग्णालय सुरु करण्यात आले आहे. इंडियन ऑइल कॉर्पोरेशन लिमिटेडच्या कॉर्पोरेट सोशल रिस्पॉन्सिबिलिटी (CSR) आणि आरोग्यम अंतर्गत ५० बेड क्षमता असलेले रुग्णालय उभारण्यात आले आहे. या रुग्णालात आर्थिक दुर्बल घटकातील नागरिकांवर मोफत उपचार केले जाणार आहेत.

रुग्णालयाची इमारत सोमवारी (०२ डिसेंबर) दीनदयाल हेल्थ केअर हॉस्पिटलची इमारत दीनदयाल जनसेवा प्रतिष्ठानला सुपूर्द करण्यात आली. मुख्यमंत्री डॉ. प्रमोद सावंत यांच्या उपस्थित हा कार्यक्रम पार पडला. यावेळी मुख्यमंत्री सावंत बोलत होते.

10.36 कोटी रुपये खर्चून उभारण्यात आलेल्या या रुग्णालयात ५० बेडची सुविधा आहे. आर्थिक दुर्बल घटकातील लोकांवर मोफत उपचार केले जातील, अशी माहिती मुख्यमंत्री सावंत यांनी यावेळी दिली. इंडियन ऑइल कॉर्पोरेशन लिमिटेड आणि आरोग्यमचे मुख्यमंत्र्यांनी यावेळी आभार मानले.

आरोग्य सेवा क्षेत्रात महत्त्वपूर्ण योगदान दिल्याबद्दल मी IOCL चे मनापासून आभार मानतो. आरोग्य सेवा क्षेत्रात प्रवेश केल्याबद्दल मी दीनदयाल को ऑप सोसायटी ट्रस्टचे अभिनंदन करतो, असेही मुख्यमंत्री सावंत म्हणाले.

कधीपासून सुरु होणार रुग्णालय?

डिचोली येथे उभारण्यात आलेले आयुर्वेदिक आणि ॲलोपॅथिक औषधोपचार रुग्णालय येत्या चार ते पाच महिन्यात सुरु होईल, असेही सावंत म्हणाले. अशा पद्धतीचे गोव्यातील हे पहिले रुग्णालय असल्याचेही त्यांनी नमूद केले.

या रुग्णालयाचा राज्यात येणारे पर्यटक, महाराष्ट्र आणि कर्नाटकातील नागरिकांना देखील फायदा होणार आहे. खेड्या, गावातील नागरिकांसाठी रुग्णालयाची सेवा पुरवण्याचा उद्देश आहे. डिचोली तालुक्यात हे रुग्णालयात होत असल्याचा मला आनंद होत आहे, असे मुख्यमंत्री सावंत म्हणाले.