Narve Ferry Jetty Illegal Restaurant

पणजी: डिचोली तालुक्यातील नार्वे फेरी धक्क्याजवळ बेकायदेशीरपणे उभारलेला बार-कम-रेस्टॉरंट गोवा किनारा क्षेत्रीय व्यवस्थापन प्राधिकरणाने (जीसीझेडएमए) पाडण्याचे आदेश दिलेले असतानाही त्याची अंमलबजावणी होत नसल्याचे दिसत आहे. मिळालेल्या माहितीनुसार ते बांधकाम वाचविण्यासाठी संबंधित मालकाने राजकारण्यांचे उंबरे झिजवण्यास सुरुवात केली आहे. त्यामुळे आदेश असूनही कारवाई करण्यात येत नाही, याबद्दल आश्‍चर्य व्यक्त करण्यात येत आहे.

नदी जलवाहतूक विभाग, तसेच डिचोलीतील नगर नियोजन विभागाचे (टीसीपी) उपनगर नियोजक यांनी संयुक्तपणे जीसीझेडएमएकडे या फेरी रॅम्पच्या पुढील रस्त्याच्या बांधकामाबाबत तक्रार केली होती. जीसीझेडएमएने जानेवारी महिन्यात वर्षाच्या सुरुवातीला तपासणी केली होती. त्या तपासणीत ते बांधकाम २०११ च्या कोस्टल रेग्युलेशन झोन (सीआरझेड) अधिसूचनेचे पूर्णपणे उल्लंघन करत आहे. ते उभारलेले बांधकाम सीआरझेड-३ क्षेत्रामध्ये पूर्णपणे स्पष्ट दिसून आले आहे.

या बांधकामामुळे किनारा क्षेत्रास व खारफुटीच्या बफर झोनचाही या परिसराला फटका बसला असल्याचे निरीक्षण नोंदविण्यात आले. कायद्याचे उल्लंघन केल्याप्रकरणी बार कम रेस्टॉरंटच्या मालकास जीसीझेडएमएने कारणे दाखवा नोटीस बजावली होती. याशिवाय नदी परिवहन खात्याने या बांधकामाविषयी नार्वे पंचायतीकडे त्या बेकायदेशीर बांधकामाविरोधात माहिती मागवून घेतली होती.जीसीझेडएमएने २४ सप्टेंबर २०२४ रोजीच्या आपल्या आदेशात हे बांधकाम बेकायदेशीर ठरवले आहे.

सीआरझेड नियमांचे उल्लंघन

सदर बांधकाम पूर्णपणे सीआरझेड नियमांचे उल्लंघन करणारे आहे. नार्वे फेरी धक्क्याशेजारील हे बांधकाम फेरी बोटीच्या व वाहनांच्या वाहतुकीला अडथळा निर्माण होत असल्याचे देखील आढळून आले आहे. त्यामुळे ते हटविणे आवश्यक आहे. प्राधिकरणाने काढलेल्या आदेशाच्या तारखेपासून एका महिन्यात ते बांधकाम हटवावे, असेही डिचोली उपजिल्हाधिकाऱ्यांनी सूचित केले होते. तरीही हे बांधकाम अद्याप हटविण्यात आले नाही. त्यामुळे ते बांधकाम वाचविण्यासाठी संबंधित मालकाची धडपड सुरू असल्याचे स्पष्ट होत आहे.