Vasco : जोशी पेट्रोलपंपाजवळ एका मनोरुग्णाने गाड्यांची तोडफोड करून नंतर पेट्रोलपंपाचे मीटर फोडले. मनोरुग्णाला लोकांनी चोप दिला. त्यानंतर पोलिसांच्या स्वाधीन केले.

सकाळी साडे दहा वाजता जोशी पेट्रोल पंपाजवळ एक व्यक्ती हातात काठी घेऊन धावत आला आणि तिथे पार्क करून ठेवलेल्या चार चाकी वाहनांच्या काचा फोडण्यास सुरुवात केली. नंतर त्याने जोशी पेट्रोलपंपाच्या दिशेने धाव घेऊन पेट्रोलपंपावरील मीटरची नासधूस केली.

पेट्रोलपंपावर तीन महिला कर्मचारी व एक पुरुष कर्मचारी कामावर होते. सदर इसम धुडगूस घालत असल्याचे पाहून कर्मचाऱ्यांनी तेथून पळ काढला. गाडीत पेट्रोल घालण्यासाठी आलेल्या वाहनचालकांनीही घाबरून पळ काढला.

सदर इसम नासधूस करत असल्याचे पाहून काही लोकांनी त्याला ताब्यात घेऊन चोप दिला आणि त्यानंतर त्याला दोरीने बांधून ठेवून पोलिसांना माहिती दिली.

पोलिस स्थानकात नेऊन त्याची चौकशी केली असता तो इसम मनोरुग्ण असल्याचे सांगण्यात आले. त्या इसमाच्या वडील पोलिस स्थानकात येऊन तो मनोरुग्ण असल्याचे प्रमाणपत्र पोलिसात दाखल केले. चौकशीनंतर त्याला सोडण्यात आले.