गोंयच्या दर्यादेगांचेंर टारबॉल्स येवपाचे प्रमाण दरवर्सा वाडत आशिल्यान तांचो सैमाचेंर खुब्ब वायट परिणाम जाता, ते खातीर हाचेंर बेगीनुच उपाय काडचो पडटलो अशे विधान पर्यटन मंत्री रोहन खंवटे हांणी केला. गोंयच्या वेगवेगळ्या दर्यादेगांचेंर आयिल्ले टार बॉल्स नितळ करपाचे काम सरकारान सध्या सुरू केला. तशेंच ह्या टारबॉल्साचे नमुने घेंवन तांची चांचणी करची अशें गोंय प्रदुशण मंडळांक सांगला .पर्यटन मंत्री रोहन खवटेंन बेरेस्तारा सांजे दक्षीण गोंयच्या आरोशी दर्यादेगेची पळोवणी केली. ह्यावेळार नुस्तेमार खात्याचे अधिकारी , पर्यटन खात्याचे अधिकारी तशेंच प्रदुशण मंडळाचे अधिकारी लेगीत हाजीर आशिल्ले.

नवें 40 कोटींचें राजभवन राज्यपाला खातीर न्हय तर हें दिल्ली सावन गोंयांत येवपी म्हत्वाच्या लोकांखातीर आसा अशी म्हायती आपणाक मेळिल्ल्याचें विजय सरदेसाय सांगता. भाजपा सरकारान पयश्यांचो वापर करताना बारीकसाणेन चितूंक जाय. सद्या गोंयची आर्थीक परिस्थीती साप्प बाबत आसा तातूंत लोकांक गरजेंचे कितें हाचेर सरकारान लक्ष दिवपाक जाय. गरजे शिवाय प्रकल्प बांदप हें सरकाराक म्हारग पडटलें. देखून सरकारान पयश्यांचो वापर करताना विचार करचो, अशें विधान विजय सरदेसायान केला.

अटल सेतू पुलाचेर वाहन चालकां कडल्यान व्हड प्रमाणाचेर येरादारी नेमांचें उल्लंघन जाता. वेगाची मर्यादा आसतना लेगीत वाहन चालक अटल सेतू पुलाचेर वाहनां खूब गतीन चलयतात. ह्या कारणाक लागून पुलाचेर अपघात जातात. हाचेर नियंत्रण येवचें म्हूण येरादारी पुलिसांनी स्पीड रडाराचो आदार घेवन, येरादारी नेम मोडपी वाहन चालकांक दंडात्मक कारवाय करपाची मोहीम हातांत घेतल्या.ही मोहीम बिरेस्तार सावन चालीक लायल्या. वेग मर्यादा मोडपी वाहनांची नोंद ह्या स्पीड रडाराचेर जातली. ते उपरांत संबदीत वाहन चालकाक थंयच आडावन ताका घरा चलत धाडून दंडात्मक कारवाय करतले, अशी म्हायती येरादारी पुलिसांनी दिली.

दुयेसांतल्यान बरें करपाची आशा दाखोवन, धर्मांतरण करपाक लायिल्ल्या प्रकरणांत म्हापशें पुलिसांनी सडयें शिवोली हांगासरल्या फायव्ह पिलर चर्चीचो सर्वेसर्वा डॉमनिक डिसोझाक अटक केली. कुचेले रावपी प्रकाश कृष्णा खोब्रेकार आनी खोर्ली म्हापश्यां रावपी निखील शेट्येन पुलीशेंत डॉमनिका आड लेखी कागाळ नोंदयल्ली. दुयेसांतल्यान बरे करपाचें हांयस दाखोवन, धर्मांतरण कर, अशी बळजबरी केल्ल्याचें ह्या कागाळींत नोंद आसा. तशेंच धर्मांतरणांक विरोध केल्ल्यान डॉमनिकान कागाळकारांक धमकी दिली आनी धार्मीक भावना दुखयल्यो अशेंय कागाळींत नमूद केलां. ह्या कागाळीच्या आदाराचेंर दोन गुन्याव दाखल करून दुबावित डॉमनिक डीसोझाक म्हापश्यां पुलिशेन बिरेस्तारा उसरां रातीं ताब्यांत घेतलो. ह्या प्रकरणाचो फुडलो तपास पुलिस निरिक्षक परेश नायक हांच्या मार्गदर्शनाखाला चालू आसा. मजगतीं, डॉमनिकाची भलायकी सारकी नाशिल्ल्यान अटके उपरांत ताची भलायकी तपासपाक म्हापसा पुलिशेन ताका म्हापसां जिल्लो हॉस्पीटलांत दाखल केलां. दुसऱ्यांक जादु-टोणा करून दुयेसांतल्यान बरें करता अशें सांगपी मात स्वतः हॉस्पीटलांत वचून उपचार घेतिल्ल्याचीय म्हयती मेळ्ळ्या. फाटल्या कांय म्हयन्यां पयलीं डॉमनिकान हॉस्पीटलांत वचून स्वता:ची बायपास सर्जरी केल्ल्याचें कळटा.

60 वर्सां पिरायेच्या आनी 60 वर्सां वयल्या जेश्ठ नागरिकांक गोंयांत सगळ्या भलायकी केंद्रात कोविड 19 वाशीन बुस्टर डोस दितलें. हें वाशीन सोमार , बुधवार आनी शुक्रार सप्तकाच्या 3 दिसांत मुफ्त भलायकी केंद्रात उपल्बद आसतले ,अशें वाशीन विभागाचें मुखेली डॉ. राजेंद्र बोरकारान सांगलें. तशेंच भलायकी संचा-लना-लया कडल्यान "हर घर दस्तक" आभियान जातले. ह्या अभियानान भलायकी खात्याचें अदिकारी दर एका घरांन वचून 60 वर्सां वयल्या नागरिकांनी बुस्टर डोस घेतलो कांय ना हांची पळोवणी करतलें अशें डॉ. बोरकारान सांगला