पिसुर्ले : होंडा पंचायत क्षेत्रात येणाऱ्या भुईपाल गावातील प्रभाग क्रमांक 9 मधील एकूण 16 धनगर समाजबांधवांना सरकारच्या समाजकल्याण खात्याच्या वतीने सुरू करण्यात आलेल्या अटल आश्रय घर दुरुस्ती योजनेचा लाभ झाला आहे.

2013 साली सुरू झालेल्या या योजनेचा अद्याप येथील एकाही नागरिकाला लाभ मिळाला नव्हता. या योजनेअंतर्गत मंजूर झालेल्या मंजुरी पत्रांचे वाटप गुरुवार, 30 रोजी पर्ये मतदारसंघाच्या आमदार डॉ. दिव्या राणे यांच्या हस्ते पणजी येथे झालेल्या एका कार्यक्रमात करण्यात आले.

भुईपाल गावात प्रभाग क्रमांक 9 मध्ये ओबीसीमध्ये येणाऱ्या धनगर समाजाची अधिक लोकवस्ती आहे. त्यामुळे या प्रभागाच्या पंचसदस्य स्मिता मोटे यांनी या भागाच्या आमदार डॉ. दिव्या राणे यांच्या मार्गदर्शनाखाली त्यांच्या प्रभागातील बऱ्याच समाजबांधवांचे अर्ज भरून गटविकास कार्यालयातर्फे समाजकल्याण खात्याकडे पाठविले होते. त्यातील पहिल्या टप्प्यात एकूण 16 जणांच्या अर्जांना मंजुरी मिळाली आहे. या योजनेअंतर्गत घर दुरुस्ती करण्यासाठी सरकार दीड लाख रुपयांची मदत करीत आहे.

आतापर्यंत या प्रभागातील 45 जणांचे अर्ज भरून पंचायतीच्या माध्यमातून समाजकल्याण खात्याकडे पाठविले होते. त्यामधील पहिल्या टप्प्यात 16 लाभार्थ्यांना या योजनेअंतर्गत लाभ मिळाला आहे. इतर लाभार्थींना आमदार डॉ दिव्या राणे यांच्या सहकार्याने या योजनेचा फायदा मिळणार आहे.

- स्मिता मोटे, पंच, प्रभाग क्रमांक 9