Soro Bar Junction closed: आसगाव-बादे परिसरात भूमिगत वीज केबल टाकण्याचे काम सुरु असल्याने, स्थानिक प्रशासनाने नागरिकांसाठी एक महत्त्वपूर्ण सूचना जारी केली आहे. या कामामुळे आसगाव येथील सोरो बार जंक्शन (Soro Bar Junction) सोमवार (दि.१७) रात्रीपासून पुढील तीन दिवसांसाठी सर्व प्रकारच्या वाहनांसाठी बंद राहणार आहे. सदर परिसरात वीज केबल टाकण्याचे काम सुरु असल्याने प्रवाशांसाठी काही पर्यायी रस्त्यांची सोय करण्यात आली आहे.

वाहतुकीसाठी पर्यायी मार्ग कोणते?

या जंक्शनवरून प्रवास करणाऱ्या प्रवाशांना गैरसोयीपासून वाचवण्यासाठी वाहतूक पोलिसांनी पर्यायी मार्गांचा वापर करण्याचे आवाहन केले आहे.

• हणजूण/वागातोर/आसगाव येथून शिवोली/मांद्रे येथे जाणाऱ्या प्रवाशांनी वागातोर पेट्रोल पंप रस्त्यावरून बादे या रस्त्याचा वापर करायचा आहे. तर,

• शिवोली येथून हणजूण/कळंगूटकडे जाणारे प्रवासी मार्णा → म्हापसा → आसगाव रस्ता किंवा शिवोलीवाडो → बादे या रस्त्याचा वापर करू शकतात.

सहकार्याची विनंती

या तात्पुरत्या वाहतूक बदलादरम्यान नागरिक आणि वाहनचालकांनी सरकारी यंत्रणा आणि वाहतूक पोलिसांना सहकार्य करावे, असे प्रशासनाने आवाहन केले आहे. भूमिगत केबलचे काम वेळेत पूर्ण झाल्यास, भविष्यात नागरिकांना वीज पुरवठ्यासंबंधी चांगल्या सुविधा मिळतील.