Arpora Club Fire Tragedy: गोव्यातील हडफडे येथील 'बर्च बाय रोमियो लेन' या नाईट क्लबमध्ये लागलेल्या भीषण आगीच्या दुर्घटनेने २५ निष्पाप लोकांचा बळी गेला, त्या घटनेने अनेक कुटुंबांना कायमस्वरूपी दुःख दिले आहे. मृतांमध्ये झारखंडमधील सख्ख्या भावांसह दिल्लीतील तीन सख्ख्या बहिणींचा आणि लग्नापूर्वी बॅचलर पार्टी करण्यासाठी आलेल्या एका तरुणाचा समावेश आहे. या हृदयद्रावक घटनांमुळे गोव्याच्या पर्यटन इतिहासातील ही काळरात्र अधिकच करुण ठरली.

झारखंडमधील दोन सख्ख्या भावांचा अंत

क्लबमध्ये लागलेल्या भीषण आगीत जीव गमावलेल्यांमध्ये झारखंडमधील दोन सख्ख्या भावांचा समावेश आहे. मृतांच्या कुटुंबियांपैकी एक असलेल्या नारायण माथुर यांनी घटनास्थळी येऊन ही माहिती दिली. ते म्हणाले, मृत्यू पावलेले दोघे माझे पुतणे, म्हणजे माझ्या मोठ्या भावाचे मुलगे होते. मी त्यांच्यासाठी येथे आलो आहे. ते दोघेही या रेस्टॉरंटच्या किचनमध्ये काम करत होते. मला आज सकाळी याबद्दल समजले. आमच्या शेजारील एका व्यक्तीचाही या आगीत मृत्यू झाला असून, आम्ही सर्वजण झारखंडचे रहिवासी आहोत, असे ते म्हणाले.

लग्नाआधीच काळाने साधला डाव!

कर्नाटकातून इशाक या नावाचा एक युवक आपल्‍या पाच मित्रांसमवेत गोव्‍यात बॅचलर पार्टी करण्‍यासाठी आला होता. त्‍याचे लग्न ठरले होते. लवकरच तो बोहल्‍यावर चढणार होता. काल शनिवारी हडफडे येथील नाईट क्‍लबमध्‍ये पार्टी करण्‍यासाठी तोही मित्रांसमवेत गेला होता. पण तेथे लागलेल्‍या आगीत त्‍याचा मृत्‍यू झाला. लग्नगाठ बांधण्‍याआधीच नियतीने डाव साधला.

तीन बहिणींचा करुण अंत; एक बचावली

हडफडेतील भीषण आग दुर्घटनेत एकाच कुटुंबातील तीन बहिणींचा मृत्यू झाल्याची हृदयद्रावक माहिती समोर आली आहे. दिल्ली येथील चार बहिणी क्लबमध्ये आल्या होत्या. त्यापैकी भावना जोशी या थोडक्यात बचावल्या; परंतु सरोज जोशी, अनिता जोशी आणि कमला जोशी यांचा या आगीत करुण अंत झाला. त्यांच्यासोबत आलेले विनोद कुमार यांचाही मृत्यू झाला असून, एका क्षणात कुटुंबातील चार सदस्यांना गमावल्याने त्यांच्या घरावर दु:खाचा डोंगर कोसळला आहे.