Shooting At Vasco: घरफोडीच्या प्रयत्न केल्यानंतर पळून जात असताना चोरट्यांनी पोलिसांवर गोळीबार केला आहे. झुआरीनगर, वास्को येथील MES महाविद्यालय परिसरात मध्यरात्री रात्री दोन वाजता ही घटना घडलीय.

बंगल्यात चोरीचा प्रयत्न पोलिसांनी हाणून पाडल्यानंतर तीन चोरटे पळून जात असताना ही घटना घडली. यात एक पोलिस कर्मचारी जखमी झाल्याची प्राथमिक माहिती समोर आली आहे.

मिळालेल्या माहितीनुसार, MES महाविद्यालय, झुआरीनगर येथील एका बंगल्यात रात्री दोन वाजता तीन चोरट्यांनी चोरीचा प्रयत्न केला. यावेळी बंगल्याच्या शेजारील लोकांनी याची माहिती वास्को पोलिसांनी दिली. पोलिस तात्काळ घटनास्थळी दाखल झाले.

पोलिसांना पाहताच घाबरलेल्या चोरट्यांनी पोलिसांवर गोळीबार केला, यात एक पोलिस कर्मचारी जखमी झाल्याची प्राथमिक माहिती मिळत आहे.

दरम्यान, चोरट्यांनी घटनास्थळावरून पळ काढला. मात्र, त्यांनी सोबत आणलेल्या बाईक तेथेच सोडल्या. पोलिसांनी तीन बाईक घटनास्थळावरून जप्त केल्या आहेत. त्यातील एक बाईक कर्नाटक पासिंग असल्याची माहिती समोर आली आहे.

पोलिसांनी घटनास्थळावरून तीन बाईक जप्त केल्या आहेत, त्याआधारे चोरट्यांचा शोध सुरू आहे. दरम्यान, या घटनेमुळे सांकवाळ झुआरीनगर परिसरात काहीकाळ तणावाचे वातावरण निर्माण झाले. पोलिसांनी घटनेची गंभीर दखल घेतली असून, चोरट्यांचा कसून तपास सुरू आहे.