काणकोण: मोठा गाजावाजा करून बोलाविलेल्या काँग्रेसच्या काणकोणमधील चेतना यात्रेच्या बैठकीत कलगीतुरा पाहायला मिळाला. काँग्रेस पक्षाला सोडचिठ्ठी देऊन तृणमूल काँग्रेसच्या उमेदवारीवर काणकोणमधून निवडणूक लढविलेले महादेव देसाई यांनी बैठकीला उपस्थिती लावल्याने प्रदेश सरचिटणीस व पक्षाचे काणकोणातील पराभूत उमेदवार जनार्दन भंडारी यांनी बैठक अर्ध्यावर सोडली. त्‍यामुळे गोंधळ उडाला.

या बैठकीला महादेव देसाई यांच्‍यासमवेत त्यांचे समर्थक गावडोंगरीचे माजी सरपंच राजेंद्र देसाई, किशोर देसाई यांनी उपस्थिती लावली. देसाई यांनी सांगितले की, प्रदेशाध्यक्ष अमित पाटकर यांच्या विनंतीवरून आपण बैठकीला आलो. राजकीय पक्ष ही कोणाची खासगी मालमत्ता नाही. मी सतरा वर्षांपेक्षा जास्त काळ काँग्रेससाठी इमानेइतबारे काम केले आहे. मात्र गेल्या विधानसभा निवडणुकीत ऐनवेळी पक्षाच्या तत्कालीन नेत्यांनी माझी उमेदवारी कापली.

त्यामुळे पर्याय नसल्याने तृणमूल काँग्रेसची उमेदवारी स्वीकारावी लागली. मी व माझे कार्यकर्ते बैठकीला उपस्थित राहिल्यानेच जनार्दन भंडारी बैठक सोडून निघून गेल्याचे देसाई यांनी सांगितले. तर दुसरीकडे ‘एके ठिकाणी आगीची दुर्घटना घडल्याने तातडीने जावे लागले’ असे सांगून जनार्दन भंडारी व उपस्थित कार्यकर्त्यांनी वेळ मारून नेली. यावेळी पक्षाचे कार्यकारी अध्यक्ष युरी आलेमाव व अन्य पदाधिकाऱ्यांनी कार्यकर्त्यांना मार्गदर्शन केले. श्रीस्थळ येथील जी. एम. सिलेब्रेशन सभागृहात ही बैठक घेण्यात आली. यावेळी

गटाध्यक्ष प्रलय भगत, प्रवक्त्या पल्लवी भगत व अन्य कार्यकर्ते उपस्थित होते. मात्र आज बैठकीत झालेल्या गोंधळामुळे काँग्रेस कार्यकर्ते

बिथरले आहेत. यासंदर्भात गटाध्यक्ष प्रलय भगत यांच्याशी संपर्क साधण्याचा प्रयत्न केला असता तो होऊ शकला नाही.