मोरजी : हरमल किनारी भागातील पोलिस चौकीला मागच्या वीस वर्षांपासून रस्ता नाही. शिवाय त्या ठिकाणी जाण्यासाठी व्यवस्थित वाट नसल्याने तक्रारदारांची बरीच धांदल होत आहे. त्याबद्दल सध्या नागरिक तीव्र नाराजी व्यक्त करत आहे.

मांद्रे मतदारसंघातील किनारी भागात मोठ्या प्रमाणात पर्यटन हंगामात लाखो देशी-विदेशी पर्यटक येतात आणि या पर्यटनामुळे येथील पर्यटन व्यवसाय चालीस लागत असतो. त्याचबरोबर पर्यटन हंगामात लहान मोठ्या चोऱ्‍या, खून, मारामाऱ्या, बलात्कार, विनयभंग अशा घटना घडतात. या सर्व घटनांची स्थानिक पोलिस चौकीला माहिती द्यावी यासाठी नागरिक पोलिस चौकीचा आधार घेतात, परंतु हरमल येथील पोलिस चौकीकडे जाण्यासाठी गेल्या वीस वर्षांपासून रस्ताच नाही अशी स्थिती आहे.

एका जुन्या प्राथमिक शाळा इमारतीत हे पोलिस चौकी आहे. या चौकीकडे दुचाकीसुद्धा व्यवस्थित जाण्याची सोय नाही. त्यामुळे तक्रारदारांना नक्की पोलिस चौकी कुठे आहे याचा पत्ता लागत नसल्याने सरकारने या पोलिस चौकीकडे व्यवस्थित रस्ता करावा आणि या पोलिस चौकीला पोलिस स्टेशनचा दर्जा द्यावा, अशी मागणी हरमल येथील माजी सरपंच डॅनियल डिसोझा, काँग्रेस अध्यक्ष नारायण रेडकर, सामाजिक कार्यकर्ते तथा उद्योजक रमेश मयेकर आदींनी केली आहे.

या पोलिस चौकीवर येण्यासाठी दोन जमीनदारांच्या वादामुळे पक्का रस्ता होत नाही. आजपर्यंत सरकारनेही तसे प्रयत्न केले नाहीत. या मतदारसंघातून ज्या ज्या आमदारांनी विधानसभेत आवाज उठवला त्यांनाही यश नाही. जनतेला सुरक्षिततेची गरज आहे आणि ती सुरक्षा पोलिसांकडून अपेक्षित असते, परंतु हरमल पोलिस चौकीकडे साधी दुचाकी व्यवस्थित पोचू शकत नसल्याने पोलिसांपर्यंत तक्रारदारांच्या तक्रारी पोचणे अवघड झाले आहे.