हरमल: पंचायत क्षेत्रातील एमडीआर १७ व १८ साठी रस्त्याच्या २५ मीटर व ५ मीटर रुंदीकरणाबाबत पंचायत मंडळाकडे आराखडा वगैरे नसल्याने काहीही करणे शक्य नाही. ग्रामस्थांच्या पाठीशी पंचायत ठाम असून प्रसंगी सामूहिक राजीनामा देण्याचा इशारा पंचायत मंडळाने खास बैठकीत जाहीर केला. या बैठकीस अंदाजे ३०० ग्रामस्थ उपस्थित होते.

गावातील जुनी पिढीजात घरे व चरितार्थासाठी अस्थापने असणाऱ्या ग्रामस्थांच्या पाठीशी राहणार असून अपात्र ठरविले तरीही पर्वा नाही, असे सरपंच अनुपमा मयेकर व अन्य पंचसदस्यांनी सांगताच उपस्थित नागरिकांनी टाळ्यांचा कडकडाट करून पंचायत मंडळाचे अभिनंदन केले.

गेल्या ग्रामसभेत या प्रश्नावर ग्रामस्थांनी आक्षेप घेतला होता व खात्याच्या अधिकाऱ्यांना पाचारण करण्याची मागणी केली होती. मात्र, खात्याने अधिकारीवर्ग पाठवू शकत नसल्याचे कारण पुढे करीत, सरपंचांना लेखी कळविले.

या गावात रस्त्यानजीक असलेली घरे व आस्थापने कायदेशीर की बेकायदेशीर कोण ठरवणार व त्यासाठी नियमावली काय आहे, त्याचा आरखडा खात्याने पाठवला आहे का, अशी विचारणा केली असता, तशी कोणतीच कागदपत्रे पाठविली नसल्याचे पंचायत सचिव सुभाष कांबळी यांनी सांगितले. त्यावेळी उपस्थित ग्रामस्थांनी एकच आवाजात कागदपत्रांची मागणी करून आवाज उठवला.