Goa Illegal Hotels : राज्‍यात बेकायदा हॉटेल्‍सचा सुळसुळाट वाढल्‍याने यावर नियंत्रण ठेवण्यासाठी पर्यटन खात्‍याने राज्‍यातील सर्व पर्यटनपूरक उद्योगांची खात्‍याकडे नोंदणी करणे सक्‍तीचे केले आहे. तरीही किनारी भागातील घरांमध्ये, निवासी परिसरात बेकायदेशीरपणे लॉजिंगचा व्‍यवसाय केला जातो. अशा बेकायदा हॉटेल्‍सचा शोध घेण्यासाठी वीज आणि सार्वजनिक बांधकाम खात्‍याने नोडल अधिकाऱ्यानी नेमणूक करावी, अशी सूचना पर्यटन खात्‍याने केली आहे.

(Goa Illegal Hotels)

बेकायदेशीर हॉटेल‍स आणि लॉजिंगवर वीज आणि साबांखा त्‍यांची वीज आणि पाणी जोडणी कापण्याची कारवाई करू शकतात. दोन्‍ही खात्‍यांनी नोडल अधिकारी नेमल्‍यास अशी कारवाई तातडीने करणे शक्‍य होईल.

तसेच बेकायदेशीर गोष्टींवर आळा घालता येईल, अशी सूचना पर्यटन खात्‍याने केली आहे. अनेक निवासी परिसरात तसेच घरांमध्ये लॉजिंग चालतात, विजेचे आणि पाण्याचे बील घरगुती म्‍हणून भरतात. यामुळे सरकारचा महसूलही बुडत असल्‍याचे या सूचनेत म्‍हटले आहे.

बेकायदा हॉटेल्‍स, लॉजिंग चालकांवर कारवाई करण्यात यावी यासाठी गेल्या महिन्यात गोवा नोंदणी पर्यटन व्यापार कायद्यात सुधारणा करण्यात आली. नवीन कायद्यात संबंधित निवासस्‍थान सील करण्याची तरतूद करण्यात आली असून त्यांचा पाणी आणि वीजपुरवठाही खंडित करण्याची तरतूद करण्यात आली आहे.

राज्‍य सरकार बेकायदा व्‍यवसायावर नियंत्रण ठेवण्यासाठी गेल्‍या वर्षांपासून प्रयत्‍न करत आहे. तसेच या समस्येविषयी पर्यटनपूरक व्‍यावसायिक संघटनांनी याविषयी सरकारकडे साकडे घातले होते.