Viksit Goa 2047

पणजी: राज्य सरकारने विकसित गोवा २०४७ पथदर्शी आराखडा तयार करण्यासाठी नव्याने प्रयत्न सुरू केले आहेत. ‘चाणक्य सेवा’ या खासगी कंपनीला सल्लागार म्हणून नियुक्त करून हा आराखडा सहा महिन्यांत तयार करून घेण्याचा सरकारचा प्रयत्न आहे.

हा आराखडा तयार करण्यासाठीचे काम ‘चाणक्य सेवा’ या कंपनीकडे सोपवण्यावर राज्य मंत्रिमंडळाने मोहोर उमटविली आहे. यापूर्वीही सरकारने असा आराखडा तयार करण्याचा प्रयत्न केला होता. नंतर बोस्टन कन्सल्टींग कंपनीला असा आराखडा तयार करण्यासाठी दिलेले कंत्राट सरकारने रद्द केले होते.

अल्प मुदतीचे, मध्यम मुदतीचे आणि दीर्घकालीन नियोजन कसे केले पाहिजे, याविषयीचे मार्गदर्शन या नव्या दस्तावेजाच्या माध्यमातून केले जाणार आहे.

दस्तावेजासाठी चार कोटींची तरतूद

विकसित भारत २०४७ च्या धर्तीवर विकसित गोवा २०४७ हे लक्ष्य सरकारने ठेवले आहे. ते गाठण्यासाठी सरकारने कोणकोणत्या क्षेत्रांमध्ये काय काय केले पाहिजे, याचे मार्गदर्शन करणारा असा हा दस्तावेज असेल. गोव्याचे मूळ सौंदर्य न बिघडवता आणि गोव्याची ओळख पुसून देता विकसित गोवा कसा करता येईल, याविषयी या कंपनीने अहवालाच्या माध्यमातून मार्गदर्शन करणे सरकारने अपेक्षित धरले आहे. हा दस्तावेज तयार करण्यासाठी सरकार तब्बल चार कोटी रुपये खर्च करणार आहे.