Manohar Parrikar Goa Scholar Scheme 2024 25

पर्वरी: शैक्षणिक वर्ष २०२४-२०२५ या वर्षाकरिता मनोहर पर्रीकर स्कॉलर योजना २०१८ चे अर्ज २३ डिसेंबरपासून उच्च शिक्षण संचालनालयाच्या संकेतस्थळावर उपलब्ध असल्याची माहिती उच्च शिक्षण संचालनालयाचे संचालक भूषण सावईकर यांनी दिली.

दिवंगत माजी मुख्यमंत्री मनोहर पर्रीकर यांच्या संकल्पनेतून साकारलेली राज्य सरकारची ही प्रमुख योजना आहे. २३ रोजी दुपारी १२ वाजल्यापासून उच्च शिक्षण संचालनालयाच्या http://www.dhe goa.gov.in संकेतस्थळावर अर्ज उपलब्ध आहेत. हा अर्ज ३१ जानेवारी २०२५ रोजी सायंकाळी पाच वाजेपर्यंत संकेतस्थळावर उपलब्ध असेल, असे संचालक सावईकर यांनी सांगितले.

इथे साधू शकता संपर्क

अधिक माहितीसाठी अथवा कोणत्याही प्रश्नांसाठी कार्यालयीन वेळेत ०८३२-२४१५५८५/२४१०८२४ या क्रमांकांवर संपर्क साधावा, असे उच्च शिक्षण संचालनालयाच्या वतीने कळविण्यात आले आहे.

अर्जदारांना सूचना

भारतात अथवा भारताबाहेर पदव्युत्तर शिक्षण घेत असलेला अथवा पीएच.डी करत असलेला कोणताही पात्र उमेदवार या योजनेसाठी अर्ज करू शकतो. उमेदवाराने ऑनलाइन अर्ज करणे आवश्यक आहे. अर्जदाराने ऑनलाइन अर्जात भरलेला तपशीलच केवळ ग्राह्य मानून तेवढाच दस्तावेज किंवा तपशील स्वीकारला जाईल. निवडलेल्या उमेदवारांनाच मुलाखतीची वेळ व दिनांक सांगितली जाईल. कोणत्याही स्वरूपात प्रचार करणारा अथवा दबाव टाकणारा उमेदवार त्वरित अपात्र ठरविण्यात येईल.

अशी चालणारी कार्यप्रणाली

१अर्जदाराने ऑनलाइन अर्ज सबमिट केल्यानंतर त्याला तत्काळ म्हणजे एका मिनिटांत सबमिट केलेल्या तपशीलासह ईमेल पाठविला जाईल.

२ या इमेलची प्रिंट आउट, त्यावर चिकटवलेला अर्जदाराचा पासपोर्ट आकाराचा फोटो, स्वयं-साक्षांकित केलेली कागदपत्रे/प्रमाणपत्रे यांच्या प्रती १५ फेब्रुवारीपर्यंत उच्च शिक्षण संचालनालय, पर्वरी येथे स्पीडपोस्टने किंवा हँड डिलीव्हरीद्वारे जमा करावयाच्या आहेत.

३पहिल्या टप्प्यात स्क्रिनिंग समितीद्वारे अर्जदारांची निवड करण्यासाठी आवश्यक असलेले तपशील गोळा केले जातील. दुसऱ्या टप्प्यांत निवड समितीला आवश्यक असलेले तपशील केवळ निवडलेल्या उमेदवारांकडूनच गोळा केले जातील.