पणजी: येत्या २०२७ च्या निवडणुकीत गोव्यात आम आदमी पक्ष सरकार स्थापन करणार, असा विश्वास पक्षाचे राष्ट्रीय संयोजक अरविंद केजरीवाल यांनी व्यक्त केला आहे. केजरीवाल तीन दिवसीय गोवा दौऱ्यासाठी राज्यात दाखल झाले आहेत. यावेळी त्यांनी भाजपसह काँग्रेसवर देखील टीकास्त्र सोडले.

अरविंद केजरीवाल शुक्रवारी रात्री गोव्यात दाखल झाले. यावेळी त्यांच्यासोबत विरोधी पक्षनेत्या आतिषी देखील उपस्थित होत्या. गेल्या १३ वर्षापासून गोव्यात भाजप सरकार आहे. काँग्रेसच्या प्रत्यक्ष किंवा अप्रत्यक्ष समर्थनात भाजप सत्तेत आहे. भाजप – काँग्रेसच्या सरकारने गोव्याला केवळ आणि केवळ गुंडाराज दिले आहे, असा आरोप केजरीवाल यांनी केला.

केजरीवाल यांनी यावेळी रामा काणकोणकर यांच्यावरील हल्ल्याचा उल्लेख केला. राज्यातील कायदा आणि सुव्यवस्था कोलमडली असल्याचे केजरीवाल म्हणाले. राज्यात अवैध बांधकाम, खाण आणि मोठ्या प्रमाणावर भ्रष्टाचार वाढल्याचा आरोप त्यांनी केला.

"याशिवाय हिंसाचार, राज्य पुरस्कृत गुंडाराज, खड्डेमय रस्ते, विस्कळीत वीज पुरवठा, बेरोजगारी वाढली आहे. राज्यातील लोक भीती खाली जगत आहेत. भाजप – काँग्रेसच्या गुंडाराज विरोधात आपचे कार्यकर्ते – नेते आवाज उठवत आहेत", असे केजरीवाल म्हणाले.

केजरीवाल यांनी केलेल्या आरोपांना काँग्रेसने जोरदार प्रतित्युत्तर दिले आहे. "केजरीवाल भाजपच्या इशाऱ्यावर नाचत आहेत, असा हल्लाबोल काँग्रेस नेते गिरीश चोडणकरांनी केला. भाजपच्या फायद्यासाठी ते काँग्रेसला कमजोर करण्याचा प्रयत्न करतायेत. दिल्लीत लिहलेली स्क्रिप्ट गोव्यात सादर केली जात आहे. त्यांचा भाजपला विरोध असता तर त्यांनी काँग्रेसवर हल्ला केला नसता", असे चोडणकर म्हणाले.

गोवा काँग्रेसचे प्रभारी माणिकराव ठाकरे यांनी देखील केजरीवाल भाजपच्या इशाऱ्यावर चालत असल्याची टीका केली. काँग्रेसवर आरोप केल्याने त्याचा थेट भाजपला फायदा होणार आहे. दिल्लीत लिहलेल्या या नाटकाला गोमंतकीय बळी पडणार नाहीत. आपची हालचाली स्पष्ट बोलत आहेत. ते भाजपचे छुपे साथीदार आहेत का? असा सवाल ठाकरेंनी उपस्थित केला.

काँग्रेसच्या सहप्रभारी अंजली निंबाळकर यांनी केजरीवाल, अण्णा हजारे यांच्यासह भाजपच्या बैठकीत बसल्याचा फोटो शेअर केला आहे. "केजरीवाल हा फोटो तुम्हाला आठवतो का? गोमंतकीयांना ठरवू द्या कोण कोणासोबत युतीत आहे? गोव्यात आता तुमचा कोणताही स्टंट कामाला येणार नाही. दिल्लीत लोकांनी तुम्हाला दाखवून दिले आहे आता पंजाब आणि गोव्याची वेळ आहे", असे निंबाळकर यांनी म्हटले आहे.