वास्को: कुठ्ठाळीचे आमदार अंतोनियो वाझ यांनी महामार्गाच्या प्रलंबित कामांमुळे कुठ्ठाळीच्या रहिवाशांच्या अनेक समस्यांवर एकच उपाय शोधण्यासाठी नवीन प्रस्ताव सरकारकडे ठेवण्याचा निर्णय घेतला आहे.

वाझ यांनी सार्वजनिक बांधकाम विभाग, डब्ल्यू आर डी हायवे आणि दिलीप बिल्डकॉन लिमिटेड कंपनीच्या अधिकाऱ्यांसह हायवे आणि नवीन झुआरी पुलाच्या कामांची संयुक्त पाहणी केली. वेलंनकन्नी चॅपलजवळील भागात नियमित पाणी साचणे, नाले तुंबून पूर येणे. वाढते अपघात रोखणे याविषयी विचार विनिमय करण्यात आल्याचे वाझ यांनी सांगितले.

तब्बल तीन तास केलेल्या पाहणीनंतर वाझ यांनी पत्रकारांना सांगितले की, वाहनधारकांना महामार्गावरून केळशीच्या दिशेने जाण्यास मदत करण्यासाठी महामार्गाला समांतर सेवा रस्ता प्रस्तावित केला आहे. गती प्रस्तावित करण्याव्यतिरिक्त अपघात कमी करण्यासाठी कुठ्ठाळी क्रॉस जंक्शनवर ब्रेकर आणि महामार्गालगतची शेती वाचवण्यासाठी पाच नवीन कल्व्हर्ट घालण्यात येणार आहे, असेही आमदाप वाझ यांनी सांगितले.