मोरजी: अमली पदार्थ जवळ बाळगणे, त्याचे सेवन करणे, उत्पन्न घेणे, विकत घेणे व विकणे तसेच वाहतूक करणे हा कायद्याने गुन्हा आहे. त्यामुळे कळत-नकळत अशा गुन्ह्यात अडकण्यापासून विद्यार्थ्यांनी स्वतःला रोखले पाहिजे, असे मार्गदर्शन पोलिस अधिकारी शशांक परब यांनी विद्यार्थ्यांना केले.

पेडणे तालुक्यातील वझरी ग्रामपंचायत क्षेत्रातील भेंडाळे येथील शारदा उच्च माध्यमिक विद्यालयात राष्ट्रीय सेवा योजनेंतर्गत मोपा पोलिस ठाण्यातील पोलिसांकडून अमलीपदार्थ विरोधी जनजागृती करून विद्यार्थ्यांना मार्गदर्शन केले.

तसेच अमलीपदार्थ विरोधी कायद्याबाबत माहिती करून दिली. यावेळी अमलीपदार्थ विरोधी सेलचे पोलिस अधिकारी शशांक परब, पोलिस शिपाई निकिता म्हापसेकर, सुचिता नाईक व प्रा. गजानन मराठे आदी उपस्थित होते. कार्यक्रमाचे सूत्रसंचालन शिक्षिका सुप्रिया खोत यांनी तर आभारप्रदर्शन सायली परब यांनी केले.

नेहमीच सावध राहा!

स्वत: व आपल्या आजूबाजूच्या मित्रपरिवाराला यासंदर्भात जागरूक केले पाहिजे. या गुन्ह्यांसाठी कायद्याने कडक शिक्षेची तरतूद आहे. अमलीपदार्थ सेवन हे माणसाच्या मानसिक स्वास्थ्यासाठी हानिकारक असून त्याच्या सेवनामुळे आपल्या हातून अपराध किंवा गुन्हा घडू शकतो. या वयात आपण अशा गोष्टींपासून नेहमीच सावध राहायला पाहिजे, असे आवाहन परब यांनी केले.