Leopard Death : एका बाजूने राज्यात वेगवेगळ्या भागात जंगलांना आग लागण्याच्या वारंवार घटना घडत असून जंगलातील जनावरे आसरा घेण्यासाठी सुरक्षित जागा शोधण्यासाठी धडपडत असून सदर जनावरे काही लोकांनी शिकारीसाठी लावलेल्या फासात अडकून मरण पवण्याच्या घटना घडू लागल्या आहेत. पाडादेग शिरवई (केपे) येथे बिबट्या फासात अडकून गंभीर जखमी झाल्याने मृत झाल्याचे वनखात्यातर्फे सांगण्यात आले.

प्राप्त माहितीनुसार आज सकाळी 8.30 वा. एक युवक पाडादेग येथे एका कुळागरात बंद असलेल्या लॉज मध्ये आपल्या मित्रांसह विश्रांती घेण्यासाठी गेला असता त्याला लॉजमधील एका कोपऱ्यात बिबटा असल्याचे दिसून आल्याने त्यांनी सदर कुळागराची राखण करणाऱ्या व्यक्तीला बोलावून आणले व बिबट्या असल्याचे सांगितले.

सदर लॉज मध्ये जाऊन पाहणी केली असता बिबट्या कोणतीच हालचाल करीत नसल्याचे दिसून आल्याने याची माहिती केपे वनखात्याला दिली असता त्यांनी त्वरित घटनास्थळी धाव घेऊन पाहणी केली असता मृत अवस्थेत असलेल्या बिबट्या वाघाच्या कंबरेला फास अडकून पडला होता व यात तो गंभीर जखमी झाल्याने त्याला मरण आल्याचे वनखात्यातर्फे सांगण्यात आले.

केपे वनखात्याचे वनाधिकारी विक्रमादित्य यांनी सदर घटनेचा पंचनामा करून बिबट्याचा मृतदेह उत्तरीय तपासणीसाठी पाठवून देण्यात आल्याचे सांगण्यात आले.