पणजी: हणजूण येथील मालमत्तेच्या वादात ज्येष्ठ नागरिक मावशीचे घर जाळून टाकल्याचा आरोप असलेल्या संशयित करण चोडणकर याचा जामीन अर्ज उत्तर गोवा अतिरिक्त सत्र न्यायालयाने फेटाळला.

संशयिताचा पार्श्‍वभूमी गुन्हेगारीची आहे, तसेच त्याला जेव्हा जामीन देण्यात आला तेव्हा त्याने त्याचा गैरवापर केला आहे त्यामुळे त्याला जामीन देणे योग होणार नाही, असे निरीक्षण न्यायालयाने नोंदवले आहे.

पीडित ज्येष्ठ नागरिक असलेल्या तक्रारदाराला तिचा पुतण्या करन चोडणकर हा मालमत्तेवरून त्यांच्यात असलेल्या शत्रुत्वामुळे वारंवार जीवे मारण्याची तसेच घर जाळून टाकण्याची धमकी देत होता. त्यामुळे ती या घरातून इतर ठिकाणी राहण्यास गेली होती.

त्याचा फायदा उठवून संशयिताने तिच्या घराला आग लावली. त्यामुळे तिच्या घरातील साहित्याचे मोठे नुकसान झाले होते. याप्रकरणी हणजूण पोलिसांनी गुन्हा दाखल केला होता. हणजूण पोलिसांनी संशयित करन चोडणकर याच्या जामिनाला विरोध केला होता.

संशयिताची पार्श्‍वभूमी गुन्हेगारीची आहे, तसेच त्याचा मागील गुन्हेगारी रेकॉर्ड व सुरू असलेल्या खटल्यामुळे तो तक्रारदारासाठी धोका बनला आहे.

त्याच्याविरुद्ध इतर न्यायालयामध्येही खटले सुरू आहेत. त्याला जामीन मिळाल्यास तो ज्येष्ठ नागरिक असलेल्या तक्रारदार तसेच साक्षीदारांना धमकावू शकतो, असा युक्तिवाद पोलिसांच्यावतीने सरकारी वकिलांनी केला होता.

संशयिताला पूर्वीच्या कोणत्याही प्रकरणामध्ये दोषी धरण्यात आलेले नाही. त्याच्याविरुद्ध खटले प्रलंबित आहेत, त्यामुळे हे कारण त्याला जामीन नाकारण्यामागे असू नये. पोलिसांनी तपास पूर्ण करून १७ नोव्हेंबर २०२४ रोजी आरोपपत्र दाखल केले आहे, तेव्हापासून तो न्यायालयीन कोठडीत आहे.

सरकरी वकील व संशयिताच्या वकिलांचा युक्तिवाद न्यायालयाने ऐकून घेतल्यानंतर आरोपीने तिला जीवे मारण्याची धमकी देण्याची शक्यता आहे. जर त्याची सुटका झाली तर या घटनेत गुन्ह्याची शिक्षा जन्मठेपेची नमूद आहे.

आरोपी तक्रारदाराला या प्रकरणात साक्ष देण्याची धमकी देऊ शकतो जेणेकरून खटला थांबेल. मालमत्तेच्या वादामुळे तक्रारदार आणि आरोपीमध्ये देखील शत्रुत्व आहे, असे न्यायालयाने जामीन अर्ज फेटाळताना निरीक्षण नोंदवले आहे.