काही कालावधीपासून महिला आणि मुलींवरील अत्याच्याराच्या घटना राज्यात पुन्हा एकदा वाढल्या आहेत. अशा प्रकारच्या गुन्ह्यांमध्ये परप्रातीयांचा देखील सहभाग दिसून येतो.

एसडीपीओ जिवबा दळवी यांनी दिलेल्या माहितीनुसार, एका 19 वर्षांच्या पीडित मुलीने आपल्यावर अत्याचार झाल्याची तक्रार दाखल केली होती. तिने सांगितले की, ती तिच्या मैत्रिणीसोबत हडफडे येथील एका रिसॉर्टमध्ये पिकनिकसाठी गेली होती. यावेळी तिच्या मैत्रिणीचा प्रियकरही त्या पिकनिकला आला होता.

पिकनिकला गेलेल्या सर्वांनी पार्टी केल्यानंतर त्या मैत्रिणीच्या प्रियकराने काही वस्तू आणण्याच्या बहाण्याने आपल्या प्रेयसीला बाहेर पाठवले आणि पीडित मुलीच्या बेडरूममध्ये जाऊन पीडितेवर जबरदस्ती करण्याचा त्याने प्रयत्न केला.

पीडिता पळून जाण्यात यशस्वी झाली पण भीतीपोटी तिने वस्तुस्थिती लगेच कुणाला सांगितली नाही. मात्र तीन दिवसांनंतर मुलीने तिच्या मोठ्या बहिणीला ही घटना सांगितली आणि तक्रार दाखल केली.

आरोपी व्यक्तीचे नाव अल्बाज उर्फ अफजल नूर अहमद खान असून (वय 21) तो सध्या कामुर्लीमध्ये राहतो तर मूळचा कर्नाटकमधील रहिवासी आहे.

अल्बाज याला पोलिसांनी ताब्यात घेतले असून त्याच्यावर कलम 376 आयपीसी अंतर्गत गुन्हा नोंद करण्यात आला आहे. संबंधित घटनेचा पुढील तपास सुरू आहे.