म्हापसा: हणजूण समुद्रकिनारी पर्यटनाचा आनंद लुटण्यासाठी आलेल्या एका पर्यटक कुटुंबावर दुःखाचा डोंगर कोसळला. बनाना फ्लोटर राईड करताना, पाण्यात पडल्यामुळे रजनी सुनील इंदोलिया (३६, रा. मध्य प्रदेश) या महिलेचा मृत्यू झाला. ही हृदयद्रावक घटना बुधवारी, ११ मार्च रोजी सायंकाळी घडली.

पोलिसांच्या माहितीनुसार, रजनी आपल्या कुटुंबासह पर्यटनासाठी आल्या होत्या. बुधवारी सायंकाळी त्या कुटुंबासोबत हणजूण समुद्रकिनारी जलक्रीडा प्रकारातील ''बनाना फ्लोटर राईड''चा आनंद घेत होत्या. मात्र, राईड सुरू असताना अचानक त्यांचा तोल गेला आणि त्या पाण्यात कोसळल्या.

पाण्यात पडताच तिथे उपस्थित असलेल्या जलक्रीडा कर्मचाऱ्यांनी तातडीने रजनी यांना पाण्याबाहेर काढून किनाऱ्यावर आणले. किनाऱ्यावर आणल्यानंतर त्यांना अस्वस्थता जाणवली आणि त्या तिथेच बेशुद्ध पडल्या. तातडीने हणजूण येथील एका खासगी रुग्णालयात नेण्यात आले, परंतु डॉक्टरांनी तपासणीनंतर त्यांना मृत घोषित केले.

घटनेची माहिती मिळताच पोलिसांनी घटनास्थळी धाव घेतली. गुरुवारी, १२ मार्च रोजी बांबोळी येथील गोवा वैद्यकीय महाविद्यालयात मृतदेहाचे शवविच्छेदन करण्यात आले. मृत्यूचे नेमके कारण स्पष्ट करण्यासाठी व्हिसेरा राखून ठेवला असून पुढील तपासासाठी पाठवला आहे.

कार खड्ड्यात कोसळून महिला जखमी

राष्ट्रीय महामार्ग प्राधिकरण तसेच सार्वजनिक बांधकाम विभागाच्या निष्काळजीपणामुळे झुआरीनगर येथे बिट्स पिलानी जवळ एक चारचाकी वाहन खोल खड्ड्यात कोसळून महिला जखमी झाली. या गाडीतील चालक व लहान मुलगी सुखरूप राहिले. वेर्णाच्या दिशेने जाणारी जीए-०६ ई ९५१५ वॅगनआर चारचाकी वाहन बिट्स पिलानी जवळ एका वळणावर पोहोचताच खोल खड्ड्यात कोसळली.