डिचोली : गेल्या चार-पाच दिवसांपासून पडणाऱ्या कोसळधार पावसामुळे ‘आमठाणे’ धरणाच्या पाण्याची पातळी वाढली असून, जलसाठा क्षमतेच्या जवळपास पोचला आहे. पावसाचा जोर कायम राहिल्यास पुढील दोन-तीन दिवसांत धरण ‘फुल्ल’ होण्याची शक्यता आहे. तसे संकेतही जलस्रोत खात्याकडून मिळाले आहेत.

आमठाणेचा जलसाठा वाढल्याने या धरणावर अवलंबून असलेल्या विशेषतः उत्तर गोव्यातील जनतेसाठी ही सुखद घटना आहे. मेणकूरे-धुमासे पंचायत क्षेत्रात येणाऱ्या आमठाणे धरणाचे पाणलोट क्षेत्र ५८२ हेक्टर मीटर एवढे आहे. तर जलसाठ्याची क्षमता ५० मीटर एवढी आहे. आज (गुरुवारी) जलसाठ्याने ४९ मी. पातळी गाठल्याची माहिती संबंधित खात्याकडून उपलब्ध झाली आहे. जुलैच्या पहिल्या आठवड्यापर्यंत जलसाठा ४५.५ मीटर एवढा होता. त्यामुळे काहीसे चिंतेचे वातावरण पसरले होते.

धरणाची पातळी लवकरच ओलांडणार

हवामान बदल त्यातच पाऊस सक्रिय होण्यास झालेला उशीर यामुळे जूनपर्यंत आमठाणे धरणातील जलसाठ्यात अपेक्षेप्रमाणे वाढ झाली नव्हती. गेल्या चार-पाच दिवसांपासून पडणाऱ्या पावसामुळे धरणातील जलसाठा वाढला आहे. हे धरण ‘फुल्ल’ होण्याच्या वाटेवर आहे. पावसाचा जोर कायम राहिल्यास चालू आठवड्याच्या अखेरपर्यंत धरणाची पातळी क्षमता ओलांडण्याची आशा आहे.

-के. पी. नाईक, कार्यकारी अभियंता, डब्ल्यूआरडी.