लोकसभा निवडणुकीच्या प्रचाराचे रणशिंग फुंकण्यासाठी भाजप नेते आणि देशाचे गृहमंत्री अमित शहा गोव्यात दाखल झाले आहेत. अमित शहा दाबोळी विमानतळावर दाखल झाल्यानंतर त्यांचे मुख्यमंत्री प्रमोद सावंत यांनी पुष्पगुच्छ देऊन स्वागत केले.

दरम्यान, शहांच्या सभेपूर्वी पोलिसांनी गोवा काँग्रेस प्रदेशाध्यक्ष अमित पाटकर यांच्यासह इतर काँग्रेस नेत्यांना ताब्यात घेतले आहे.

पोलिसांनी केंद्रीय मंत्री अमित शाह यांच्या भेटीपूर्वी अमित पाटकर यांच्यासह कॅप्टन विरिएटो, मोरेनो रेबेलो, साव्हियो डिसिल्वा, टोनी डायस आणि इतर काँग्रेस नेत्यांना बाणस्तरी पुलावर ताब्यात घेतले आहे.

गोवा काँग्रेसने अब तो सच बोलो असा हॅशटॅग वापरत काँग्रेस नेत्यांना का ताब्यात घेतले असा सवाल उपस्थित केला आहे.

दरम्यान, पाटकर यांनी आज सकाळी एक ट्विट केले होते. "भाजप सरकार गोव्यातील जनतेचा विश्वासघात करायचा कधी थांबवणार खरे कधी बोलणार कधी? कर्नाटकात म्हादई वळवणे हे असेच एक भ्रष्ट कृत्य आहे. या डबल इंजिन सरकारने गोमन्तकीयांचा विश्वासघात केला आहे." असे पाटकर यांनी ट्विट केले आहे.

दरम्यान, शहांची सभा होण्यापूर्वी शहा राज्यातील भाजप नेते आणि मंत्री यांची बैठक घेणार आहेत.