केंद्रीय गृहमंत्री अमित शहा यांनी गोव्यातील सांताक्रूझ येथील श्यामा प्रसाद मुखर्जी स्टेडियमवर झालेल्या 'म्हजे घर योजना' (Mhaje Ghar Yojana) च्या भव्य सोहळ्यात बोलताना गोव्यासाठी मोठी घोषणा केली आहे. "गेल्या १५ वर्षांपासून आपम गोव्यात येत आहे. दिवसेंदिवस या राज्याचा होत असलेला विकास माझ्या डोळ्यासमोर दिसतोय. विकसित गोवा पाहण्यासाठी २०४७ पर्यंत वाट पाहण्याची गरज नाही. २०३६-३७ पर्यंत गोवा विकसित राज्य बनेल,” असा विश्वास अमित शहांनी यावेळी व्यक्त केला.

या कार्यक्रमात गोव्यातील नागरिकांची प्रचंड गर्दी जमली होती. शहा यांच्या हस्ते तब्बल २४११ कोटी रुपयांहून अधिक किमतीच्या १९ विविध विकास प्रकल्पांचे डिजिटल लोकार्पण करण्यात आले.

सर्वसामान्य नागरिकांना स्वतःचे घर

‘म्हजे घर योजना’च्या माध्यमातून गोव्यातील सर्वसामान्य नागरिकांना स्वतःचे घर मिळावे, हा राज्य सरकारचा उद्देश असल्याचे शहा यांनी नमूद केले. “पंतप्रधान नरेंद्र मोदी यांच्या नेतृत्वाखाली केंद्र सरकार ‘सबका साथ, सबका विकास’ या ध्येयावर काम करत आहे. गोवा हे देशातील सर्वात वेगाने विकसित होणारे राज्य आहे आणि भविष्यात ते विकासाचे आदर्श मॉडेल ठरेल,” असे ते म्हणाले.

परदेशी वस्तू टाळा

केंद्रीय गृहमंत्री अमित शहा यांनी यावेळी बोलताना नागरिकांना एक महत्त्वपूर्ण संदेश दिला आहे. “या दिवाळीत परदेशी वस्तूंचा वापर टाळा आणि स्थानिक भारतीय उत्पादनांना प्रोत्साहन द्या,” असे आवाहन त्यांनी केले आहे.

या कार्यक्रमाला गोव्याचे मुख्यमंत्री प्रमोद सावंत, सहकार मंत्री सुभाष शिरोडकर, तसेच अनेक मान्यवर उपस्थित होते. मुख्यमंत्री सावंत यांनीही गोव्यातील आगामी विकास प्रकल्पांची माहिती दिली आणि “२०३६ पर्यंत गोवा पूर्णपणे आत्मनिर्भर आणि स्मार्ट राज्य बनेल,” असा विश्वास व्यक्त केला.