पणजी : राज्यात आयआयटी प्रकल्प आणण्यासाठी सरकार आतूर असून प्रकल्प चांगला आहे, परंतु त्यासाठी सरकारला केवळ शेतजमीन कशी काय मिळते हा मोठा प्रश्‍न आहे. आमच्या शेतीवर आमच्या शेतकऱ्यांचा उदरनिर्वाह अवलंबून आहे. त्यासाठी हा प्रकल्प फर्मागुढी येथील पठारावर नेला पाहिजे, अशी सूचना काँग्रेस प्रदेशाध्यक्ष अमित पाटकर यांनी केली.

सुरुवातीला प्रकल्प काणकोण येथे प्रस्तावित होता, परंतु तेथे विरोध झाल्यानंतर सांगे येथे नेण्यात आला होता. सांगेतदेखील विरोध झाल्यानंतर प्रकल्प सत्तरी येथील शेळ - मेळावली येथे नेण्यात आला. मात्र, तेथेही जोरदोर विरोध झाल्यानंतर आता पुन्हा प्रकल्प सांगेला नेण्यात आला आहे. आता तेथे पुन्हा काही लोकांकडून विरोध होत असल्याने शेतजमिनीवर हा प्रकल्प कशासाठी असा प्रश्‍न आहे, असे पाटकर म्हणाले.

दरम्यान फोंड्याजवळील फर्मागुढी येथे गोवा सरकारची लाखो चौरस मीटर जमीन असून तेथे हा प्रकल्प का आणला जात नाही, असा सवाल त्यांनी सरकारला केला आहे. आयआयटी प्रकल्पावरुन गोव्यात सध्या वातावरण तापलं असून सरकारला कोंडीत पकडण्याचा प्रयत्न काँग्रेसने चालवला आहे.